Հյուսիսային ծովում՝ Նիդեռլանդների ափերի մոտ (Ռոտերդամի ափից 100 կմ հեռավորության վրա) երկու նավերի բախման հետևանքով զոհվել է 4 նավաստի, անհետ կորել է 7 մարդ: Այս մասին հայտնում է ITAR-TASS-ը՝ հղում անելով աղետի վայրում աշխատող փրկրարարներին:
Չորեքշաբթի երեկոյան ծովում միմյանց են բախվել Բահամանյան կղզիների դրոշի ներքո նավարկող ավտոմեքենատար Baltic Ace նավը (ուղևորվում էր Բելգիայից Ֆինլանդիա) և Կիպրոսի դրոշի ներքո նավարկող, բեռնարկղեր փոխադրող Corvus J-ը (ուղևորվում էր Շոտլանդիայից Բելգիա): Վթարից հետո առաջին նավը խորտակվել է:
Փրկարարներին հաջողվել է ջրից ողջ դուրս բերել 13 մարդու, որից 4-ին հոսպիտալացրել են:
Փրկարարական օպերացիայում ներգրավվել են ուղղաթիռներ, առափնյա պահպանության մոտորանավակներ և ռազմածովային ուժերի երկու նավեր:
Միջադեպի պատճառները հայտնի չեն:
