«Հայկական ժամանակ»-ը գրում է, որ երեկ կրկին «թեժացել» էր ԲՀԿ առաջնորդ Գագիկ Ծառուկյանի` ՀՀ նախագահի թեկնածու առաջադրվելու մասին լրատվությունը: Թերթը ներկայացնում է տարբեր հրապարակումներ և նշում. «Մի քանի ժամ տարբերությամբ «լույս տեսած» այս երկու լրատվությունները միայն մեկ բանի մասին են վկայում. Սերժ Սարգսյանն ու Գագիկ Ծառուկյանը սարսափելի ծանր «հակամարտության» մեջ են. իրար ուտում են, իրար սպառնում են, կոմպրոմատներով իրար վախեցնում, գոտկատեղից ներքև հարվածներ խոստանում, մի խոսքով` երբեմնի կոալիցիոն գործընկերները դուրս են եկել իրար դեմ, անհաշտ պայքար են մղում և այդ պայքարում միջոցներ չեն խնայում: Տպավորություն է ստեղծվում, թե Սերժ Սարգսյանի համար այնքան անցանկալի է Գագիկ Ծառուկյանի առաջադրումը, որ նման բան անելու դեպքում նրան սպառնում են ինչ-որ «փաստաթղթերի» հրապարակմամբ: Գագիկ Ծառուկյանն էլ այնքան սկզբունքային է, որ իր հերթին սպաոնում է, նման բան անելու դեպքում, Սերժ Սարգսյանի կյանքից` 90-ականներից դրվագներ հրապարակել: Չենք ուզում, իհարկե, ստվեր գցել դարի այս «թշնամանքի» վրա, սակայն մի քանի հարց կա, այնուամենայնիվ»:
«ՀԺ»-ն հավելում է, որ եթե այդ հակամարտությունն իրական է, ապա ի՞նչ եք կարծում` իրավապահները չե՞ն կարող հաշված րոպեների ընթացքում ձերբակալել Գագիկ Ծառուկյանին, օրինակ, տարիներ շարունակ հարկերից չարամտորեն խուսափելու համար, երբ դրա ապացույցների պակաս չկա: Կամ մի՞թե Գագիկ Ծառուկյանը` որպես 2008 թվականի Մարտի 1-ի իրադարձությունների «ավելի փոքր դերակատար» և «հրաման կատարող», չի կարող րոպեների ընթացքում բացահայտել «Մարտի 1»-ի պետական դավաճանությունը, հրապարակել գործող անձանց ցանկն անուն առ անուն և մանրամասնորեն պատմել, թե ով ինչ էր անում 2008-ի մարտի մեկին, այդ թվում և հատկապես` Սերժ Սարգսյանը: Տեսականորեն, իհարկե, կարող են: Գործնականում դա, իհարկե, լինել չի կարող, որովհետև սրանք արդեն լուրջ են:
