Անհրաժեշտ էր, որպեսզի ՌԴ-ն 4 միլիարդի զենք չվաճառեր Ադրբեջանին: Այս մասին այսօր «Առաջին լրատվական»-ի հետ զրույցում ասաց «Ժառանգություն» կուսակցության փոխնախագահ Արմեն Մարտիրոսյանը՝ անդրադառնալով հայ-ադրբեջանական և ղարաբաղա-ադրբեջանական հակամարտ զորքերի շփման գծում առկա լարվածությանը: Նա նշեց, որ ընդամենն անհրաժեշտ էր, որպեսզի ՌԴ-ն 4 միլիարդի զենք չվաճառեր Ադրբեջանին, որ նրանք էլ զինվեին ու փորձեին այսպիսի գործողություններ իրականացնել, բայց պատճառները շատ են:
«Առաջին հերթին մենք իշխանությունների սխալ քաղաքականության արդյունքում ունեցանք մի իրավիճակ, երբ մեր արտաքին դիրքերը փոքր-ինչ թուլացան, իսկ Ադրբեջանը ներկայում փորձում է օգտվել դրանից և ուժային գործողություններով իր դիրքերն ամրապնդել ու ցույց տալ, որ ինքն առավելագույնի է գնալու: Սակայն ամբողջ խնդիրն այն է, որ Հայաստանը ՀՀ իշխանությունները չեն: Սա մե՛ր հայրենիքն է, և անկախ նրանից, թե ինչ իրավիճակ կլինի մեր քաղաքական կյանքում՝ արտաքին ագրեսիայի դեմ մենք միասնական պետք է լինենք:
Փառք ու պատիվ մեր զինվորներին, որոնք իրենց հայրենի ավանդույթները շարունակում են և կարողանում են հերոսաբար մարտնչել: Այս երկու զինվորների հերոսական մահը, Արմեն Հովհաննիսյանի հերոսական մահը ցույց են տալիս, որ այդ ռազմիկի ոգին մեր երիտասարդների մոտ կա, և ազատամարտիկների, հասարակության միավորման արդյունքում իրենք կարող են ցանկացած արտաքին ագրեսիայի դեմն առնել:
Խուճապի տրամադրության հիմքեր չկան, ընդամենը Ադրբեջանի կողմից տեղի է ունենում բանակցային գործընթացում իր դիրքերի ամրապնդում: Մեզ ընդամենը պետք է քաղաքական իրավիճակի փոփոխություն, հասարակության կողմից վստահելի իշխանությունների ձևավորում՝ ազատ ընտրությունների միջոցով, ներքաղաքական, ներպետական, ներհասարակական համերաշխություն, և մնացած բոլոր խնդիրները, կարծում եմ, հնարավոր է լուծել: Այդպիսի խորը և բարդ իրավիճակ, խոշոր հաշվով, չկա»,- նշեց Արմեն Մարտիրոսյանը:
Առաջարկում ենք մանրամասներին ծանոթանալ տեսանյութի միջոցով:
