Այսօր ՆԱՏՕ-ի տեղեկատվական կենտրոնը հյուրընկալել էր Հայաստանում ԱՄՆ դեսպան Մարի Յովանովիչին, ով իր ելույթի նախաբանում խոսելով ՆԱՏՕ-ի գործունեության, ինչպես նաև Հայաստան-ՆԱՏՕ հարաբերությունների և համագործակցության մասին` պատասխանեց լրագրողների հարցերին:
«Առաջին լրատվականը» հիշեցնելով, որ վերջերս Մ.Յովանովիչը նշել էր, թե` կարևոր է ձևավորել կառավարություն, որը լսում է մարդկանց և հաշվետու է նրանց առջև`հարց ուղղեց արդյո՞ք մեր իշխանությունը լսում է մարդկանց, հաշվետու է և ինչպե՞ս կարելի է մեկնաբանել այն փաստը, որ դեռ շարունակում են անազատության մեջ մնալ Մարտի 1-ից հետո բանտերում գտնվող քաղբանտարկյալները:
«Մենք էական ենք համարում կառավարության հաշվետվողականությունը տարածաշրջանի բոլոր երկրներում: Սակայն հաշվետվողականությունը չի նշանակում, որ երկրի յուրաքանչյուր քաղաքացի պետք է համաձայնի այն ամենի հետ, ինչ արվում է կառավարության կողմից: Մեզ համար սա նշանակում է, որ կա քաղաքական գործընթաց, որը համաձայնեցված է, գործընթաց, որտեղ լսելի է ժողովրդի ձայնը, և որը թափանցիկ է ու արդարացի: Աշխարհի բոլոր երկրներում մենք կարող ենք տեսնել, որ մարդիկ որևէ որոշման հետ համաձայն չեն` դատարանի կամ ոստիկանի, այդպիսի պայմաններում, այսինքն, կառավարությունը հաշվետու չէ: Երբեմն դա կարող է այդպես լինել, երբեմն էլ կարող է նշանակել, որ այդ քաղաքական ուժը պարտվել է այդ քաղաքական բանավեճում: Ի վերջո, յուրաքանչյուր երկրի ժողովուրդ ինքը պետք է որոշի` արդյո՞ք իր կառավարությունը հաշվետու կերպով է աշխատում»,- հայտարարեց ԱՄՆ դեսպանը:
