Մոլդովայի Հանրապետությունը գնահատում է Բելառուսի և Ղազաստանի որոշումը՝ չմիանալու պատժամիջոցներին, որոնք իր դեմ սահմանել է Ռուսաստանը: Այս մասին օրերս հայտարարել է արտաքին գործերի և եվրոպական ինտեգրման հարցերով մոլդովացի նախարար Նատալյա Գերմանը Europa Libera-ի հետ հարցազրույցում:
Նա հայտնել է, որ Մոլդովայի ղեկավարության հետ առևտրային հարաբերությունների քննարկման համար սեպտեմբերին Քիշնև կայցելի Բելառուսի նախագահ Ալեքսանդր Լուկաշենկոն: Քիշնևում հույս ունեն, որ Բելառուսը, ինչպես եղել է նաև նախկինում, կփրկի Մոլդովային՝ գնելով նրանից այն, ինչից հրաժարվել է Ռուսաստանը: Խոսքը մրգերի, պտուղ-բանջարեղենային պահածոների և գինու մասին է:
Մոսկվայի կողմից 2006-ին սահմանված գինու էմբարգոյից հետո Մինսկն արգելված ապրանքի գնումը կատարել է Մոլդովայի Հանրապետության հետ երկկողմ հարաբերությունների շրջանակում: Այսօր իրավիճակն այլ է. 2010 թվականից սկզբնավորվել է Մաքսային միությունը, որի անդամներն են Ռուսաստանը, Բելառուսը և Ղազախստանը: Միասնական տնտեսական տարածքում, ՄՄ կանոններով, ցանկացած այլ երկրից ապրանքները կարող են հայտնվել միայն միությունում կոնսենսուսի առկայության դեպքում:
Սակայն, ինչպես ցույց է տալիս Մոլդովայի օրինակը, կոնսենսուս Մաքսային միությունում չկա: Ռուսաստանի որոշմանն աջակցելու դաշնակիցների ցանկության բացակայությունը կասկածի տակ է դնում ռուսական իշխանությունների հաստատումն առ այն, թե Մաքսային միությունը կայացել է:
Օրինակը միակը չէ: Ապրիլին Ալեքսանդր Լուկաշենկոն առաջարկել էր 10 տարով հետաձգել Եվրասիական տնտեսական միության ձևավորումը, քանի որ կարծում է, որ Ռուսաստանն ու Ղազախստանը պատրաստ չեն դրան: Եվ դրանով հարվածի տակ է դրել Ռուսաստանի ևս մեկ ինտեգրացիոն գաղափար՝ Եվրասիական տնտեսական միության ստեղծման մասին: Լուկաշենկոն նշել է, որ քանի որ Մաքսային միության գործընկերները պատրաստ չեն չեղյալ հայտարարելու փոխադարձ առևտրում բացառումներն ու սահմանափակումները, նոր միավորման մասին խոսելու հարկ չկա: Նավթի մատակարարումների սահմանափակումները պետք է չեղյալ հայտարարվեին 2015-ից, սակայն Ռուսաստանը մտափոխվել է դրանցից հրաժարվելու հարցում:
Դժգոհություն ունի նաև Ղազախստանը: Երկրի ընդդիմությունը հանդես է գալիս Մաքսային միության դեմ: Ուկրաինան նախկինում հատարարել է, որ ՄՄ երկրների տնտեսությունների ցածր մրցունակությունը, ինչպես նաև նրանց կողմից ուղիղ ներդրումների չափազանց ցածր մասնաբաժինը հիմնավորում են, թե ինչու է Կիևը ձգտում դեպի Եվրամիություն: Մոլդովայի իշխանությունները պարզաբանում չեն արել, պարզապես հայտարարել են, որ ՄՄ չեն գնա:Այս տարի Մոլդովան ստորագրել և վավերացրել է ԵՄ-ի հետ Ասոցացման համաձայագիրը: Ուկրաինան այն նույնպես ստորագրել է, սակայն դեռևս չի վավերացրել՝ գրում է «Նեզավիսիմայա գազետան»:
Դեպի ԵՄ-ի ազդեցության գոտի Ուկրաինայի և Մոլդովայի փաստացի գնալուց հետո հասկանալի դարձավ, որ ինտեգրացիոն ասոցացիաները հետխորհդային տարածքում կա՛մ արդեն փլուզվել են, կա՛մ դրա եզրին են: Առաջին հերթին դա վերաբերում է ԱՊՀ-ին: Համագործակցությունից նախ հեռացավ Վրաստանը, այնուհետև՝ Ուկրաինան:
Պատրանքները վերջականապես փլուզվեցին Ուկրաինայի իրադարձություններից հետո: Դա առաջ է քաշել մոտակա արտերկրում Մոսկվայի քաղաքականության վերանայման անհրաժեշտության հարցը: Առանց դրա Ռուսաստանը ենթարկված է թշվառական մնալու ռիսկին այն տարածքում, որն ավանդաբար համարում էր իր ազդեցության գոտին:
