Դեկտեմբերի 2-3-ը Սանկտ Պետերբուրգում կայացած «Եվրասիական ինտեգրացիա 21-րդ դարում» միջկուսակցական միջազգային ֆորումի ժամանակ Հայաստանի, Ադրբեջանի, ՌԴ–ի և Ղազախստանի իշխող կուսակցությունները համատեղ արձանագրություն են ստորագրել: «Երկիր Մեդիա» հեռուստաընկերության «Երկրի հարցը» հաղորդման եթերում, անդրադառնալով այսօր մամուլում հնչած դժգոհություններին, որ ՀՀԿ և «Ենի Ազերբայջան» կուսակցությունների ստորագրությունները նույն փաստաթղթի տակ են դրվել, ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը նշել է, որ ոչ թե հուշագիր է ստորագրվել, ինչպես նշվում է մամուլում, այլ՝ արձանագրություն:
Մինչ այս, ամռանը «Միացյալ Ռուսաստան» կուսակցության նախաձեռնությամբ սկսվել են բանակցություններ, և Կազանում տեղի է ունեցել առաջին նիստը: «Նպատակն էր ստեղծել եվրասիական երկխոսության ձևաչափ, որը միջկուսակցական երկխոսություն էր եվրասիական ինտեգրման վերաբերյալ՝ բոլոր ասպեկտներով: Սա փորձ է հասկանալու՝ կոնկրետ «եվրասիական ինտեգրում» գաղափարի հասկացության ներքո որ կուսակցությունները ինչ օրակարգ կարող են ձևավորել»,- ասել է Արտակ Զաքարյանը: Կազանից հետո նախաձեռնությունը վերցրել է ՀՀԿ-ն՝ նոյեմբերին Ռուսաստանի, Ուկրաինայի, Բելառուսի և ԼՂՀ–ի երկուական կուսակցություններ հրավիրելով Երևան և քննարկելով, թե ինչ մոտեցում կարելի է ձևավորել, որ եվրասիական երկխոսությունն առավել տեսանելի լինի: Երրորդ փուլն արդեն Սանկտ Պետերբուրգում էր: «Սա միջկուսակցական երկխոսության ձևաչափ է: Սանկտ Պետերբուրգում որոշվեց արդեն միջկուսակցական ֆորումի տեսքով ամփոփել դիրքորոշումներն ու համաձայնությունները: Գոյություն ուներ հուշագիր, որտեղ բոլորի առաջարկությունները կային: Մենք, որպես կուսակցություն, պատրաստ էինք ստորագրել: Քանի որ «Ենի Ազերբայջանը» նոր էր ցանկություն հայտնել միանալ, ղրղզական կուսակցությունը ևս, ոչ թե հուշագիր ստորագրվեց, այլ նախագիծ, որը հետո պետք է ստորագրվի: Սա ընդամենը «եվրասիական ինտեգրում» գաղափարի շուրջ մոտեցումներ են, որոնք պարտադիր և իրավական փաստաթուղթ չեն»:
Գալով այն հարցին, որ Հայաստանի ու Ադրբեջանի իշխող կուսակցությունների ստորագրությունը դրվում է նույն փաստաթղթի տակ, Արտակ Զաքարյանը պատասխանել է, որ երկու երկրներն էլ բազմաթիվ կառույցների, այդ թվում և ԱՊՀ անդամ են, և նրանց ստորագրությունները շատ համատեղ փաստաթղթերի տակ է դրվում: «Ի սկզբանե ձեռք է բերվել այն համաձայնությունը, որ սա այն հարթակը չէ, որտեղ խոսվելու է հայտնի խնդիրների և կամ հայ-ադրբեջանական համագործակցության մասին: Ընդամենը ՀՀԿ-ն իր ուշադրությունն է հրավիրում եվրասիական ինտեգրման գործընթացին, այնքանով, որքանով մյուս կուսակցությունները»,- ասել է ՀՀԿ անդամը:
Եվրասիական միության մասին էլ Արտակ Զաքարյանն ասել է, որ զուտ տնտեսական ասպեկտով, իհարկե, Եվրասիական միությունը կարող է դառնալ գրավիչ գաղափար, որովհետև խոսքն ընդհանուր տնտեսական տարածքի մասին է, որտեղ գործելու են նոր սկզբունքներ, և մեզ համար տնտեսական նոր հնարավորություններ կլինեն:
