Շենգավիթի շուկայում 3 տաղավար է մնացել ու 3 վաճառող: 2008թ. շուկան վերանորոգվել է, որից հետո սկսել է դատարկվել: Այստեղ այլևս ոչ մի գյուղացի իր մթերքը վաճառելու չի բերում, թե՛ գյուղացիները, թե՛ վաճառողները իրենց ապրանքն իրացնում են սնկի պես ավելացող բանաջարեղենի խանութներում:
Մինչ վերանորոգումը քաղաքապետարանի կողմից անընդհատ խոստումներ են հնչել, որ շուկայում շարժն ավելանալու է, որ այն դարձնելու են այդ վարչական շրջանի գյուղմթերքի հիմնական կետը: Բայց բոլորովին այլ պատկեր է ստացվել. շուկայում հարկային բեռն ավելացել է, իսկ տաղավարների փոխարեն շուկայի տարածքում մեծամասամբ մեքենաներ են կայանված:
Շուկայում մնացած 3 տաղավարներում էլ առևտուրը քիչ է, եկամուտ չկա: «Մեր շուկայից հիմնականում օգտվում են թոշակառուները, «նիսյայի» երեք տետր ունեն , 100-ից ավել մարդիկ պարտք ունեն, չեն կարողանում վճարել. թոշակը ստանում են ու կոմունալ վճարները հազիվ տալիս, պարտքն էլ ամիսներով մնում է»,- «Առաջին լրատվական»-ի հետ զրույցում վստահեցրին շուկայի աշխատակիցները՝ հավելելով , որ համայնքում մարդկանց թիվը գնալով պակասում է, ինչը չի կարող չազդել առևտրի վրա: «Ժամերով կանգնում են, օր կա՝ 1000 դրամ տուն չենք տանում»,- ասացին շուկայում:
Տարեց մի կին, որ համեմունքների վաճառքով է զբաղվում, փաստում էր, որ անգամ 200-250 դրամ արժողությամբ համեմունքը շատ հաճախ այստեղից պարտքով են գնում:
Շուկայի աշխատակիցների պնդմամբ՝ ընդհանուր առմամբ, երկրի սոցիալական վիճակը ծանր է, և դա երևում է հենց իրենց՝ հասարակ խավի վրա, ուստի իշխանությունները պարտավոր են փաստի հետ հաշվի նստել: Տեղի գնորդներն էլ ընդգծեցին՝ ինչպե՞ս կարող են առանց պարտքի գոյատևել, եթե չնչին կենսաթոշակ են ստանում, իսկ նրանք, ովքեր աշխատում են, հազիվհազ կարողանում են կոմունալ վճարումները կատարել, երեխաների հոգսերը հոգալ: «Պետք է աշխատատեղեր ստեղծվեն, կենսաթոշակները բարձրանան, իսկ իշխանությունները հիմա կուլտուրական գենոցիդ են անում, ասում են՝ «չքվեք- չքվեք»,- ասաց գնորդներից մեկը:
