Որքան էլ Հովիկ Աբրահամյանի կառավարությունը վստահեցնի, թե անում են ամեն ինչ, որպեսզի բարելավի գործարար միջավայրը, ներդրումներն ավելացվեն և այլ, սակայն կառավարության իրական քայլերը բոլորովին այլ բանի մասին են վկայում:
ՊԵԿ-ը և ԴԱՀԿ-ն կալանք են դրել Վանաձորում գործող «Բազում» կարի արտադրական ձեռնարկության հաշիվների, դրամական միջոցների վրա, ինչի հետևանքով ընկերությունը չի կարողանում ազատ գործունեություն ծավալել: Իսկ նշված ընկերությունն աշխատում է եվրոպական հայտնի բերնդների հետ: Նրանցից հումք է ստանում, օժանդակ միջոցներ և տեղում կատարում եվրոպական ընկերությունների պատվերն ու արտահանում արտադրանքը:
Վերջին անգամ ընկերությունը համաձայություն է ձեռք բերել տղամարդու հագուստի արտադրությամբ զբաղվող իտալական Paul & Shark հայտնի ընկերության հետ: Ընկերությունը Հայաստան է ուղարկել բոլոր անհրաժեշտ միջոցները, որպեսզի այստեղ կարվի ապրանքը և արտահանվի Եվրոպա, ինչն անհամեմատ ավելի էժան է, քան Իտալիայում արտադրելը: Իսկ պայմանավորվածությունը եղել է այնպես, որ եթե ժամանակին ու որակով արվի պատվերը, ապա իտալական ընկերությունը 2-3 տարվա պայմանագիր կկնքեր Վանաձորի կարի ձեռնարկության հետ: Վանաձորի արտադրամասը ժամանակին կատարել է պատվերը, բեռնել մեքենան, որը սակայն 10 օր շարունակ մնացել է մաքսակետում:
ՊԵԿ-ը և ԴԱՀԿ-ն ձեռնարկության հաշիվների վրա կալանք են կիրառել՝ վարկային պարտավորությունները չկատարելու պատճառաբանությամբ և թույլ չեն տվել անգամ մաքսատուրքը վճարել, որպեսզի իտալական ընկերության բեռնատարը իր ապրանքով դուրս գա Հայաստանի սահմանից: Եվ սա այն դեպքում, երբ հումքը, ապրանքը և մնացած անհրաժեշտ միջոցները պատկանել են իտալական ընկերությանը:
«Իմ գույքի և հաշիվների վրա արգելանք է կիրառվել, մենք չկարողացանք անգամ մաքսատուրքը վճարել, որ այդ ապրանքը դուրս գա: 10 օր շարունակ բեռնափոխադրող մեքենան կանգնած է մնացել մաքսատանը, ինչի հետևանքով իտալական կազմակերպությունը հրաժարվել է պայմանագիր կնքել մեզ հետ»,- «Առաջին լրատվական»-ի հետ զրույցում ասաց ձեռնարկության գործադիր տնօրեն Յուրի Միքայելյանը: Վերջինիս խոսքով՝ իրենք այդ օրերին դիմել են Սերժ Սարգայանին, վարչապետին, Գագիկ Խաչատրյանին, արդարադատության նախարարին, գործատուների միությանը՝ պնդելով, որ այդ ապրանքը իրենցը չէ, պատրաստի ապրանքը իտալական ընկերության ապրանքն է, և ԴԱՀԿ-ը չի կարողա կալանքի պատճառով թույլ չտալ, որ ապրանքը արտահանվի:
«Խնդրեցի, ասացի՝ 1 ժամով բացեք, թող մեքենան դուրս գա, բայց ոնց պատին կխփես քարով՝ նույնն է թե մեր այդ կառույցների հետ կփորձես որևէ հարց լուծել: Դրա հետևանքով Paul & Shark-ը մեզանից հրաժարվեց, չնայած որ շատ գոհ էր որակից, 1500 եվրո տուգանեց, որ 10 օր շարունակ մեքենան կանգնած է մնացել մեր մաքսակետում, ու ամեն ինչ ավարտվեց»,-վրդովված պատմեց Միքայելյանը՝ հավելելով, որ բազմաթիվ զանգերից հետո 10 օր անց բեռնատարը դուրս է եկել մաքսակետից, սակայն արդեն ուշ է եղել: Պայմանագիրը չեղյալ է համարվել:
Վերջինիս խոսքերով՝ այս իրավիճակի պատասխանատուն բացառապես կառավարությունն է, որը հասկանալի չէ՝ ինչով է զբաղված: Իսկ եթե ինչ-որ բանով էլ զբաղված է, ապա մեկ-երկու գործարարների շահերը սպասարկելով:
«Այնպիսի տպավորություն է, որ այս երկրում կառավարություն չկա: Չեն ուզում օգնել ձեռնարկատերերին, որպեսզի նրանք կարողանան ոտքի կանգնել, կարողանան աշխատել, որ աշխատատեղ բացվի, և մարդիկ չարտագաղթեն: Մենք բազմիցս ենք դիմել մեր կառավարությանը, որպեսզի ինչ-ինչ հարցերով օժանդակի, բայց այդ օժանդակությունը բացառված է եղել:
Մեր կառավարությունը բացարձակապես չի աշխատում, իսկ եթե աշխատում էլ է, ապա այն մի խումբ մարդկանց համար է, այն մի քանի արտոնյալների համար է, որոնց բիզնեսը ծաղկում է: Մեզ միայն 1-2 տարվա մեջ մի քանի միլիոն դրամով տուգանել են, այն դեպքում, երբ շնչելն անհնար է: Հիվանդին թթվածին են տալիս, ոչ թե փակում թթվածնի խողովակը: Բայց մեր «հանճարեղ» կառավարությունը և կառավարության «հանճարեղ» ղեկավարն այդքանը չեն հասկանում»,- նկատեց ձեռնարկատերը:
Փաստորեն, հայրենի կառավարությունը հեշտությամբ կարող է խոչընդոտել 15-20 տարի ամերիկյան, ֆրանսիական, իտալական, գերմանական հայտնի ընկերությունների հետ համագործակցող, եվրոպական չափանիշներով արտադրանք թողարկող և արտահանող ձեռնարկության աշխատանքին, ինչ է թե՝ այդ ձեռնարկությունն իրենցը չէ: «Արտասահմանյան ֆիրմաները շատ գոհ էին մեզանից, և որակից, և այն ժամանակից, որում մենք աշխատում ենք, բայց շատ հաճախ թքում են Հայաստանի վրա, քանի որ մենք այսպիսի կառավարություն ունենք»,-եզրափակեց Յուրի Միքայելյանը:
Վերջինս հավելեց, որ բազմաթիվ բողոքներից հետո իրենց մաքսային հաշիվը բացվել է, ընկերությունն այս օրերին նոր ընկերության հետ է աշխատում: Բայց հարկային հաշիվները դեռ փակ են: «Կա մարդկանց խումբ, որ շահագրգռված է այս ամենով: Շահագրգռված է, որ Հայաստանում քիչ մարդ մնա, որ քիչ պրոբլեմ լինի իրենց համար»:
Լուսանկարը՝ armcom.am-ի
