Դեկտեմբերի 2-ին Արթիկի տարածաշրջանի եկեղեցական համայնքներն առանձնացվեցին Շիրակի թեմից և հռչակվեցին Արթիկի թեմ, որի առաջնորդ է նշանակվել Մայր Աթոռի միջեկեղեցական հարաբերությունների բաժնի տնօրեն Տեր Հովակիմ եպիսկոպոս Մանուկյանը: Վերջինս կաթողիկոսի ծննդավայրից՝ Ոսկեհասկից է:
Մինչ այդ, սակայն, Շիրակի հոգևոր թեմի միակ առաջնորդն էր Միքայել եպիսկոպոս Աջապահյանը: Այսուհետ թեմը երկրորդ հոգևոր առաջնորդ կունենա:
Միքայել եպիսկոպոս Աջապահյանն «Առաջին լրատվական»-ի հետ զրույցում նշեց, որ եթե անգամ Շիրակի թեմը չորս հոգևոր առաջնորդ ունենա, ի՞նչ կա դրա մեջ, դրա մեջ վատ բան չկա: Երբ հետաքրքրվեցինք, թե արդյո՞ք մենակ չէր կարողանում Շիրակի բոլոր համայնքներում հովվություն անել, Միքայել եպիսկոպոս Աջապահյանն ասաց.«Որքանով հասցնում, անում էի, բայց դե 119 համայնք էր, հիմա 119-ից 24 համայնքի հարցը որ լուծվեց, 95-ին հասնելն ավելի հեշտ է»:
Եվ այստեղ, նրա խոսքերով, «ճշտի-սխալի հարց չկա, վեհափառի իրավունքն է թեմերի բաժանել, կիսել, նոր թեմեր ստեղծել, վերամիավորել, և նա իր իրավունքի սահմաններում գործել է այնպես, ինչպես հարկ է համարել, և մենք այստեղ վատ բան տեսնելու իրավունք չունենք»:
Իսկ այն դիտարկմանը, որ նորանշանակ թեմի առաջնորդը կաթողիկոսի համագյուղացին է, Միքայել եպիսկոպոս Աջապահյանը պատասխանեց. «Ի՞նչ վատ բան կա համագյուղացի լինելու մեջ, ինչ անենք, որ համագյուղացին է»:
Միքայել եպիսկոպոս Աջապահյանը, ով նախկինում մեզ հետ զրույցում ասել էր, որ Գյումրիի անօթևանների ֆոնին Վարդան Ղուկասյանի թույլ տված շռայլությունները, հատկապես «Ալեքսանդրապոլ» հյուրանոցի կառուցումը անբարոյականություն է, հիմա գոհ է քաղաքապետի փոփոխությունից։ «Հույս ունենք, որ փոփոխություններ կլինեն, այդ հույսով ենք ապրում, վաղուց արդեն Գյումրիում քաղաքապետ փոխելու անհրաժեշտություն կար»,- հավելեց նա:
