Հայաստանի Հանրապետության փոխվարչապետ, տարածքային կառավարման նախարար Արմեն Գևորգյանը դեկտեմբերի 3-ին Փարիզում հանդիպել է Զարգացման ֆրանսիական գործակալության (ԶՖԳ) գլխավոր տնօրեն Դով Զերահի հետ:
ՏԿՆ հասարակայնության հետ կապերի բաժնից «Առաջին լրատվական»-ին հայտնում են, որ կողմերը քննարկել են ջրային և այլ ենթակառուցվածքների զարգացման ոլորտներում համագործակցությանն առնչվող հարցեր:
Դով Զերահն անդրադարձել է ԶՖԳ պատվիրակության` վերջերս Երևան կատարած այցին` նշելով, որ պայմանավորվածություններ են ձեռք բերվել ջրամատակարարման ու ջրահեռացման և մի շարք այլ ոլորտներում ծրագրերի վերաբերյալ: Գործակալությունը Հայաստանում նախատեսում է նաև գյուղատնտեսության, մասնավոր հատվածի, ն ուղղված, ինչպես նաև ջրամբարաշինության (մասնավորապես Վեդիի ջրամբարի կառուցման) նախագծեր իրականացնել: Հեռանկարային են համարվում գյուղական տարածքների զարգացման ծրագրերը:
ԶՖԳ գլխավոր տնօրենը ողջունելի է համարել նաև հայ-ֆրանսիական ապակենտրոնացված մակարդակով արդյունավետ գործակցությունը` նշելով, որ գործակալությունը սատարում է այդ ուղղությամբ աշխատանքներին: Նա պատրաստակամություն է հայտնել աջակցել համագործակցության խորացմանը` համատեղ ծրագրերի իրականացման գործում Եվրամիության ու միջազգային դոնոր կազմակերպություններից միջոցներ ներգրավելով:
Փոխվարչապետը ողջունել է Հայաստանի հետ փոխգործակցության խորացման գործակալության մտադրությունները` նկատելով, որ ԶՖԳ-ի ուշադրության կենտրոնում գտնվող ոլորտներն առաջնային են նաև Հայաստանի կառավարության համար: Նա ընդգծել է ԶՖԳ փորձառությունը տարբեր երկրներում զարգացման հաջող ծրագրերի իրականացման գործում և հայկական կողմից փոխշահավետ նախագծերի իրականացմանն աջակցելու պատրաստակամություն հայտնել: Պայմանավորվածություն է ձեռք բերվել, որ ԶՖԳ-ն կմասնակցի հաջորդ տարի Ֆրանսիայում կայանալիք ապակենտրոնացված համագործակցության հայ-ֆրանսիական երկրորդ համաժողովին:
ԶՖԳ-ն ծրագրեր է իրականացնում աշխարհի տարբեր երկրներում, որոնք հիմնականում ուղղված են տնտեսության աճին, ենթակառուցվածքների զարգացմանը, ջրային ռեսուրսների արդյունավետ կառավարմանը:
