Իրանական Mehr լրատվական գործակալության փոխանցմամբ՝ Իրանում հրատարակվող ոչ կառավարամետ 23 թերթերի ղեկավարներ բաց նամակ են հղել երկրի նախագահ Մահմուդ Ահմադինեժադին, որում նրան խնդրել են միջոցներ ձեռնարկել երկրում մամուլի տնտեսական վիճակը բարելավելու ուղղությամբ:
Նրանք սպառնացել են, որ հակառակ դեպքում կփակվեն տվյալ թերթերը, և մամուլի հազարավոր աշխատակիցներ ու լրագրողներ կդառնան գործազուրկ: Թերթերի ղեկավարներն իրենց նամակում նախագահին մատնացույց են արել երկրի չափազանց մեծ սղաճը, թղթի թանկացումը, տպագրական ծախսերի ավելացումը, ինչպես նաև պետության կողմից մամուլին տրամադրվող սուբսիդիաների կրճատումը, ինչը հանգեցրել է թերթերի տնտեսական իրավիճակի վատթարացմանը:
