Օրերս Ռուսաստանի Անվտանգության դաշնային ծառայության (ԱԴԾ) աշխատակիցների կողմից Մոսկվայի «Դոմոդեդովո» օդանավակայանում, հայտնի «կինգիսեպյան» հանցավոր խմբավորման գործերի բացահայտման շրջանակներում, ձերբակալված Հայկական սփյուռքի ամենահարուստ ներկայացուցիչներից մեկի՝ Լևոն Հայրապետյանի հարազատները, ընկերներն ու մտերիմները շարունակում են անհանգստացած մնալ գործարարի առողջական ու հոգեկան առողջությամբ: «Առաջին լրատվական»-ի հետ զրույցում այս մասին տեղեկացրեց Նիսի հայ համայնքի ներկայացուցիչ, գործարար Լևոն Հայրապետյանի մտերիմ ընկեր և վստահված անձ, գործարար Մացակ Փոլադյանը: Վերջինս տեղեկացրեց, որ վերջին քննարկումները Լևոն Հայրապետյանի ընկերների ու փաստաբանների միջև քիչ առաջ են տեղի ունեցել, խոսել են, ու որևէ նորություն չկա, սպասում են բժշկական հանձնաժողովի ձևավորմանը, որպեսզի ամենաարագ ժամանակահատվածում Լևոն Հայրապետյանին տեղափոխեն հիվանդանոց: Ըստ նրա՝ փաստաբանական խումբը զբաղվում է նաև առաջադրված մեղադրանքների ժխտման ուղղությամբ, քանի որ պաշտպանական կողմը, նաև Լևոն Հայրապետյանը չի ընդունում իրեն առաջադրված մեղադրանքը:
«Ամենակարևորը նրա առողջությունն է, որովհետև նա իր բնավորությամբ, եթե իրեն ճանաչեիք, այնպիսի ակտիվ մարդ է, որ այս ամենը շատ դժվար է տանում: Իմ վերջին տեղեկությունն այն է, որ նրա առողջական վիճակն այնքան վատ չէ, որքան հոգեկան վիճակը: Նա ահավոր ծանր է ընդունում տեղի ունեցածը: Իրեն ճանաչողները գիտեն՝ ինչ բնավորության տեր անձնավորություն է: Երեկ նա հանդիպել է դստեր հետ, այդ հանդիպումը կարճ է տևել, բայց ամենակարևորը նույն վիճակն է՝ առողջությունը վատ, իսկ հոգեկան վիճակը՝ ավելի վատ: Այսօրվա վերջին անգամ հանդիպել են փաստաբաններն ու մեր ընկերներից մեկը, ասում են, որ հոգեպես ընկճված է: Տեսակցելու հետ կապված ևս դժվարություններ կան»,- ասաց Փոլադյանը:
Ինչ վերաբերում է տեղի ունեցածի պատճառներին՝ նա ասաց, որ քննարկելով պատճառները վերջնական եզրակացության չեն հանգել: «Ընդհակառակը, մենք ուրիշ փակագծեր ենք բացում, որը դեռ չենք ուզում հանրային քննարկման առարկա դարձնել: Բացահայտում ենք անձեր, որոնք կարող է՝ կապ ունենան»,- ասաց նա՝ հավելելով, որ անձերը Հայաստանի հետ կապ չունեն:
Եզրափակելով՝ Մացակ Փոլադյանը ևս մեկ անգամ հորդորեց և լրատվամիջոցներին, և քաղաքական գործիչներին, և կուսակցություններին զերծ մնալ Լևոն Հայրապետյանի անվան շուրջ դիվիդենտներ հավաքելուց, այդ թվում՝ հակառուսական տրամադրություններ տարածելուց՝ դրանով իսկ վնասելով անձամբ Լևոն Հայրապետյանին:
Հիշեցնենք, որ օրերս Ռուսաստանի Անվտանգության դաշնային ծառայության (ԱԴԾ) աշխատակիցները ձերբակալեցին Հայկական սփյուռքի ամենահարուստ ներկայացուցիչներից մեկին՝ Լևոն Հայրապետյանին, Մոսկվայի «Դոմոդեդովո» օդանավակայանում, հայտնի «կինգիսեպյան» հանցավոր խմբավորման գործերի բացահայտման շրջանակներում, որի հետևում կանգնած էր ազդեցիկ ռուսական սենատորներից մեկը: Ներկա պահին Լևոն Հայրապետյանը մեղադրվում է մի քանի քրեական հոդվածներով՝ փողերի լեգալացում հանցավոր ճանապարհով, չարաշահումներ, փողերի վատնում: Ըստ պաշտոնական վարկածի՝ ռուսական սենատոր Իգոր Իզմեստևն է խոստովանել Հայրապետյանի հետ իր հանցավոր կապերի մասին: Առաջիկայում հայ գործարարին մեղադրանքը կառաջադրվի պաշտոնական կերպով:
