Վթարված «Ֆուկուսիմա-1» ատոմակայնի մերձակայքում այսօր գրանցվել է ուժեղ երկրաշարժ: Դրա ուժգնությունը էպիկենտրոնում կազմել է 6.0 մագնիտուդ: Այն գտնվել է երկրի մակերևույթից 9 կմ խորության և մայրաքաղաք Տոկիոյից 118 կմ հեռավորության վրա: Այս մասին հաղորդում է Kyodo գործակալությունը: Եվս երկու ավելի թույլ ուժգնությամբ երկրաշարժեր գրանցվել էին ավելի վաղ: Նրանց ուժգնությունը եղել էր 5 մագնիտուդի սահմաններում: Ավերածությունների և զոհերի մասին տեղեկություններ չեն հաղորդվում:
Մինչդեռ այսօր կրկին ավելացել է մարտի 11-ի զոհերի ցուցակը: Այս պահին այնտեղ գրանցված է 9,300 անուն: Ավելի մեծ է անհետ կորածների ցուցակը, որում առնվազն 13,800 անուն կա: Այս մասին հաղորդում է Associated Press գործակալությունը: Իսկ Միյագի պրեֆեկտուրայի իշխանությունները, որն ամենաշատն է տուժել երկրաշարժից և ցունամիից, հայտարարել են, որ միայն իրենց շրջանում զոհերի թիվը կհասնի 15 հազարի:
Նաև նոր գնահատականներ են ներկայացվել բնության արհավիրքի նյութական վնասների վերաբերյալ: Ճապոնիայի կառավարության տվյալներով, երկրաշարժի և ցունամիի հասցրած նյութական վնասը կարող է գերազանցել 300 մլրդ դոլարը: Էկոնոմիկայի նախարար Կաորու Յոսանոն ասել է, որ իր հաշվարկները ներկայացնելու է ճապոնական կառավարության առաջիկա նիստի ժամանակ: Նրա գնահատականները տատանվում են 185-300 մլրդ-ի սահմաններում: Այս մասին հաղորդում է Associated Press գործակալությունը: