Ուկրաինայում հակաահաբեկչական գործողության մարտիկները զինյալներից ազատել են Լուգանսկի մարզի Սևերոդոնեցկ քաղաքը: Հիմա ուժայինների վերահսկողության տակ են բնակավայրի կենսականորեն կարևոր բոլոր օբյեկտները: Այս մասին հայտնել է Լուգանսկի մարզում Ուկրաինայի ՆԳՆ վարչության ղեկավար Անատոլի Նաումենկոն՝ հայտնում է news.liga.net-ը՝ հղում անելով ՆԳՆ մամլո ծառայությանը:
«Իրավապահները վերահսկողության տակ են վերցրել քաղխորհրդի, ոստիկանության քաղաքային բաժանմունքի, կազմակերպված հանցավորության դեմ պայքարի տեղի վարչության, Ուկրաինայի Անվտանգության ծառայության վարչության շենքերը»,- ասվում է հաղորդագրության մեջ:
Քաղաքի ազատագրմանը մասնակցել են Ազգային գվարդիայի և ՆԳՆ ստորաբաժանումները:
«Օբյեկտներից մեկում ուժայինները 2 սպանված քաղաքացու մարմին են գտել: Բացի դրանից, 4 գերի է ազատվել՝ հարևան շրջանների բնակիչներ, որոնք գերության մեջ անցկացրել են մոտ 1 ամիս: Նրանցից ամենամեծը 57 տարեկան է, ամենափոքրը՝ 21: Նրանք հայտնել են, որ ահաբեկիչներն իրենց կտտանքների են ենթարկել»,- նշել են ՆԳՆ-ում:
Ազատված քաղաքացիների հետ տարվում են անհրաժեշտ հետաքննական միջոցառումներ, պարզվում են նրանց գերի ընկնելու բոլոր հանգամանքները:
