Կազիմիրովի հայտարարությանը չպետք է մեծ նշանակություն տալ: Անդրադառնալով ԵԱՀԿ Մինսկի խմբի ռուս նախկին համանախագահ Վլադիմիր Կազիմիրովի հայտարարությանը` «Առաջին լրատվական»-ի հետ զրույցում նման կարծիք հայտնեց Ֆրանսիայի Ռազմավարական հետազոտությունների հիմնադրամի փորձագետ, քաղաքագետ Կայծ Մինասյանը:
«Վլադիմիր Կազիմիրովի հայտարարությունը ո՛չ մեծ հայտնություն է, ոչ էլ նորություն: Այո, Ղարաբաղի հիմնահարցը պետք է լուծել խաղաղ ճանապարհով, բայց հարց է` ԵԱՀԿ Մինսկի խմբի համանախագահները կկարողանա՞ն արդյոք որևէ բան անել:
Եթե հայտարարեն, որ չեն կարողանում, ապա խնդիրը պետք է հանձնեն ՄԱԿ-ի Անվտանգության խորհրդին: Այդ դեպքում ձևաչափն ամբողջովին կփոխվի: Երևի թե խորհուրդը կգա Հայաստան և նոր ուղիներ կփնտրի կամ իր լուրջ ազդեցությունը կունենա: Բայց չեմ կարծում, որ այդպես լինի, որովհետև և՛ Հայաստանը, և՛ Ադրբեջանը գիտեն` ինչ կկորցնեն, եթե խնդիրը հանձնվի ՄԱԿ-ի Անվտանգության խորհրդին:
Ընդհանրապես, Կազիմիրովը` որպես դիվանագետ, ելնելով այն ամենից, ինչ մինչ այժմ կարդացել եմ նրա մասին, ինչպեսև նրա բոլոր հայտարարությունները, պետք է ասեմ, ավելի անհատական, ավելի զորավոր բաներ է հայտարարել: Չեմ կարծում, թե պետք է շեշտը դնել այսպիսի հայտարարությունների վրա, մանավանդ որ նորություն չէ: Ասել, թե նա ոչ սովորական ռուս դիվանագետ է` նույնպես սխալ ձևակերպում է:
Ինչ վերաբերում է Ղարաբաղյան հիմնահարցի լուծմանը, ապա դա, բնականաբար, ձեռնտու է և՛ ադրբեջանցիներին, և՛ մանավանդ հայերին: Սակայն ադրբեջանցիները խոսքով ասում են, որ ուզում են Ղարաբաղյան հիմնահարցը լուծել խաղաղ ճանապարհով, իսկ գործնականում այլ բան են անում»,- ասաց Կայծ Մինասյանը:
Հիշեցնենք, որ ԵԱՀԿ Մինսկի խմբի ռուս նախկին համանախագահ Վլադիմիր Կազիմիրովը, «Հարավային Կովկասի տարածաշրջանային անվտանգության դինամիկա» միջազգային համաժողովում անդրադառնալով Ղարաբաղյան հիմնահարցին, հայտարարել էր, թե ժամանակն է, որ ԵԱՀԿ Մինսկի խումբը խաղաղությանը «փափուկ» հարկադրելու կուրս որդեգրի: Նա նաև նշել էր, այս խնդիրը լուծելիս պետք է նախևառաջ շեշտադրել պատերազմի անթույլատրելիությունը:
