Ֆրանսիան և Գերմանիան հազիվ թե աջակցեն Ռուսաստանի դեմ նոր պատժամիջոցները՝ գրում է The Independent-ը՝ հղում անելով ֆրանսիական և գերմանական բարձրաստիճան դիվանագիտական աղբյուրներին: Խոսքը ռուսական էներգետիկ, ֆինանսական և պաշտպանական ընկերությունների նկատմամբ պատժամիջոցային ռեժիմի խստացման մասին է, որի օգտին հանդես է գալիս Բրիտանիան՝ ասվում է հոդվածում:
Իսկ բրիտանական կառավարությունում բարձրաստիճան աղբյուրները ասել են, որ «եվրոպական մյուս մայրաքաղաքների ընդդիմանալը» քիչ հավանական է դարձնում Բրյուսելում ԵՄ անդամ երկրների ԱԳՆ ղեկավարների հանդիպման ընթացքում Ռուսաստանի նկատմամբ նոր պատժամիջոցների համաձայնեցումը: Միաժամանակ՝ աղբյուրները նշել են, որ իրավիճակը կարող է փոխվել:
Բրիտանացի պաշտոնյաների խոսքով՝ շատ բան կախված կլինի Նիդերլանդների դիրքորոշումից, որն Ուկրաինայում կործանված մալայզիական Boeing-ի աղետի հետևանքով կորցրել է իր ավելի քան 190 քաղաքացու:
Փարիզն ու Բեռլինը, իրենց կողմից, մտավախություն ունեն, որ Մոսկվայի դեմ անհապաղ լրացուցիչ պատժամիջոցներ սահմանելը կարող է անարդյունավետ լինել և խանգարել, մասնավորապես, մալայզիական ինքնաթիռի աղետի հետաքննության հետ Ռուսաստանի համագործակցությանը:
Ավելի վաղ Մեծ Բրիտանիայի վարչապետ Դևիդ Քեմերոնը հայտարարել էր, որ ռուսական տնտեսությունը կարող է ոլորտային պատժամիջոցների բախվել, եթե Մոսկվան խոչընդոտի Ուկրաինայում մալայզիական ինքնաթիռի կործանման վայրին հասանելիությանը և նպաստի Ուկրաինայում ռազմական հակամարտություններին:
