«Բարգավաճ Հայաստան» կուսակցությունից լուրեր են դրվում շրջանառության մեջ, թե իրենց առաջնորդ Գագիկ Ծառուկյանը մի քանի այլ պատգամավորների հետ միասին առաջիկայում կարող է մեկնել Բրյուսել: Սակայն չեն հայտնում, թե նա ինչ նպատակներով է մեկնում, ում հետ է մեկնում, ով կամ որ կառույցն է նրանց հրավիրել: Կամ միգուցե ոչ մեկն էլ չի հրավիրել, այլ պարզապես դա զուտ Ծառուկյանի կամ նրա և իր մի քանի պատգամավորների մասնավոր այցն է, որը հետո կարող է ներկայացվել, որպես եվրոպական կառույցների կողմից հրավիրված պաշտոնական այց, որն այդ քաղաքական ուժի կողմից օգտագործվի կարճատև PR անելու համար:
Հակառակ դեպքում, հավանաբար Բրյուսել գնալու լուրը շրջանառության մեջ դնելու հետ մեկտեղ, որոշակի տեղեկատվություն էլ կհրապարակեին, թե այդ այցն ինչ նպատակ ուներ կամ ինչ հանդիպումներ է նախատեսում: Մինչդեռ կուսակցությունից առայժմ խուսափում են մեկնաբանել, թե դա ինչ այց է, ով է հրավիրել, կամ միգուցե առանց հրավերքի է, ինչ հանդիպումներ է նախատեսում և այլն: Այնուամենայնիվ հետաքրքիր է հասկանալ, թե Գագիկ Ծառուկյանին ու իր պատվիրակությանն այնտեղ ովքեր կարող են սպասել կամ ընդունել:
Բրյուսելում են գտնվում Եվրամիության և այլ միջազգային կամ եվրոպական կառույցների գրասենյակները: Եվ ոչ միայն Հայաստանի, այլև աշխարհի շատ այլ երկրների պաշտոնյաներն ու քաղաքական ուժերի ղեկավարները պարբերաբար պաշտոնական այցեր են կատարում այդ կառույցներ: Հաճախ նման այցերն ունենում են շատ պարզ՝ խորհրդատվական կամ ճանաչողական բնույթ, որը եվրոպական կառույցները կազմակերպում են Հայաստանի նման երկրների քաղաքական գործիչների կամ լրագրողների հետ: Բացի այդ, եվրոպական կառույցներում, այդ թվում և` Եվրամիությունում ընդունված կարգ կա, որ հանդիպեն իրենց հետ որոշակի հարաբերությունների կամ ծրագրերի մեջ գտնվող երկրների ոչ միայն իշխանությունների, այլև ընդդիմադիր ուժերի հետ: Արդյոք հնարավո՞ր է, որ Գ. Ծառուկյանին հրավիրեն որպես նման ուժի ղեկավար: Բայց եվրոպական այդ կառույցներում նույնպես շատ լավ գիտեն Գ. Ծառուկյանի ու «Բարգավաճ Հայաստանի» ողջ պատմությունը: Գիտեն, որ Ծառուկյանը մինչև մայիսյան խորհրդարանական ընտրությունները կոալիցիայի անդամ է եղել և իշխանական մյուս ուժերի հետ միասին բավականաչափ օգտվել է իշխանական կերակրատաշտից: Գիտեն, որ նա այժմ ընդդիմադիր ուժ չէ և խուսափում է որպես ընդդիմություն ներկայանալուց: Որ իր համար ընտրել է դասական քաղաքականության մեջ անհայտ «այլընտրանքային» կարգավիճակը, որից դեպի իշխանություն նույնիսկ մեկ քայլ էլ չի մնում: Որ նա գրեթե իշխանություն է, հատկապես, որ նրա կուսակցության անդամը կառավարությունում նախարարական պորտֆել է զբաղեցնում՝ սպորտի և երիտասարդության հարցերի նախարար Հրաչյա Ռոստոմյանը: Կամ նույն ինքը Ծառուկյանը, պատգամավոր լինելուց զատ, զբաղեցնում է մեկ այլ բարձր պաշտոն` Օլիմպիական կոմիտեի նախագահն է: Եվրոպական կառույցներում շատ լավ գիտեն, որ Ծառուկյանը Հայաստանի ամենախոշոր մի քանի գործարարներից մեկն է, և թե ինչ ճանապարհով ու ինչ արտոնյալ պայմաններում է ձեռք բերել այդ ահռելի ունեցվածքը: Եվ որ անձամբ նրա ու նրա մերձավոր կամ կուսակից տարբեր անհատների անվան հետ կապված են տարբեր քրեական պատմություններ ու այդպես շարունակ: Այնպես որ, դժվար թե եվրոպական կառույցները նրան ու իր կուսակիցներին հրավիրեն որպես ընդդիմադիր ուժի կամ նախագահի հնարավոր թեկնածուի:
Այդպես էլ մնում է անհայտ, թե Ծառուկյանն ու իր պատվիրակությունն ի՞նչ գործ ունեն Բրյուսելում: Միգուցե որոշել են այնտեղ ինչ-որ բիզնես հիմնել կամ որևէ գործարան գնել: Կամ որոշել են Եվրոպական ժողովրդական կուսակցությանն անդամակցելու հետ կապված հանդիպումներ ունենալ: Չէ՞ որ անցած տարի ԵԺԿ-ն անդամակցության համար դիմած հայաստանյան 4 կուսակցություններից միայն ԲՀԿ-ին մերժեց իր շարքերն ընդունել: Բայց այդ դեպքում էլ հենց այս օրերին Հայաստանում է գտնվում ԵԺԿ նախագահ Վիլֆրիդ Մարտենսը` իր պատվիրակության հետ, և հանդիպումներ է ունենում Հայաստանի քաղաքական ուժերի հետ: Այստեղ է նաև Եվրահանձնաժողովի նախագահ Ժոզե Մանուել Բարոզուն և այլոք: Գ. Ծառուկյանը եթե եվրոպական կառույցների հետ լուրջ հանդիպումներ ունենար, այստեղ էլ կարող էր որոշ հարցեր լուծել:
Այդպես էլ Հայաստանի քաղաքական մտքի համար հանելուկ մնաց, թե ինչ պետք է անի Ծառուկյանն ու իր պատվիրակությունը Բրյուսելում: Այս պարագայում հավանական է թվում այն տեսակետը, թե այդ այցի մասին նախատեղեկատվությունը զուտ PR նպատակներ հետապնդող ինչ-որ բան է, կամ նույնիսկ այց է, որի լրջությունը առավելագույնը կարող է այնքան լինել, որքան ԲՀԿ կազմակերպած քաղաքական կոնսուլտացիաներն էին: Թեև չի բացառվում, որ Եվրամիությունում ՀՀ դեսպան Ավետ Ադոնցը՝ Գ. Ծառուկյանի նախկին կուսակիցը, ինչ-որ հանդիպում, այնուամենայնիվ, կարողանա հաջողացնել նրա համար:
