Грузия Online-ի փոխանցմամբ`Վրաստանի նախագահ Միխեիլ Սաակաշվիլին Երևանում հանդիպել է Եվրահանձնաժողովի նախագահ Ժոզե Մանուել Բարոզուի հետ: Այս մասին հայտարարել է Վրաստանի նախագահի աշխատակազմը:
Վերջինիս հաղորդմամբ` այդ հանդիպումը կայացել է Երևանում ընթացող Արևելյան Եվրոպայի երկրների համար Եվրոպայի ժողովրդական կուսակցության գագաթնաժողովի շրջանակներում: Հանդիպման ժամանակ կողմերը գոհունակություն են հայտնել Վրաստանի ու ԵՄ միջև հարաբերությունների ներկայիս մակարդակի կապակցությամբ:
Սաակաշվիլին ու Բարոզուն կողմ են արտահայտվել Վրաստանի ասոցացման անդամության, վիզային ռեժիմի վերացման և համապարփակ ազատ առևտրի մասին համաձայնագրերի կնքմանը: Նրանք քննարկել են նաև Վրաստանի վերջին իրադարձությունները: Սաակաշվիլին հայտարարել է, որ Վրաստանը շարունակելու է ժողովրդավարության ամրապնդման ուղին: Կողմերն անհրաժեշտ են համարել «Արևելյան գործընկերության» ծրագրի շրջանակներում համագործակցության ամրապնդումը:
