Հայաստանի Հանրապետության ընտրական համակարգում փոփոխությունների առաջարկություններ կան, որոնք առաջին հայացքից, թվում է, վերաբերում են տեխնիկական զարգացումներին, մինչդեռ ուղղված են տեղական ինքնակառավարման մարմինների ժողովրդավարության զարգացմանը: Համայնքների միության նախագահ Էմին Երիցյանը հուլիսի 21-ին լրագրողների հետ հանդիպմանը նշեց, թե 2008 թվականից մինչ օրս ապակենտրոնացմանն ուղղված այլ քայլեր չեն արվել: Երիցյանի խոսքով՝ մեր երկրում ավելի շատ ապրում են բարեփոխումների սպասումով, քան բուն ռեֆորմներով:
Բանախոսը նշեց, թե քաղաքական ուժերը, կուսակցությունները պետք է լրացուցիչ շահագրգռվածություն ցուցաբերեն, որ ապակենտրոնացումը դառնա թիվ մեկ հարցը: Նա ասաց, թե իրենց միտումը կուսակցությունների դերի բարձրացումն է նաև: Նրա կարծիքով` համայնքները հետզհետե ավելի քիչ են սոցիալ – քաղաքական դերակատարություն ունենում, ինչը հանրային իշխանության գործունեության առումով վտանգավոր երևույթ է:
Երիցյանի առաջարկած փոփոխություններից մեկը վերաբերում է Համայնքի ղեկավարի (քաղաքապետ, գյուղապետ), ավագանու անդամ ընտրվելու համար միատեսակ նվազագույն տարիքային շեմ սահմանելուն. դա հիմնավորվում է նրանով, որ ՀՀ համայնքի ղեկավար ընտրվելու տարիքային ցենզ է սահմանված 25 տարին, իսկ ավագանու անդամ ընտրվելու համար՝ 21 տարին: «Երևանում ավագանու անդամ կարող է ընտրվել 21 տարին լրացած, իսկ քաղաքապետ՝ 30 տարին լրացած անձինք: Այսպիսով, խախտված են հավասար իրավունքները, և փոփոխությունը նպատակ ունի սահմանել ու երաշխավորել հավասար ընտրական իրավունքը, ինչպես նաև մեծացնել ավագանու դերը»,- ասաց նա:
Երիցյանը նշեց, թե երբ բուն գյուղերում ավագանու համար մարդիկ անգամ հետաքրքրություն չեն դրսևորում, պատճառն այն է, որ գործունեության դաշտ չկա: Խորհրդային տարիներին ամենօրյա կյանքի վրա նրանց գործունեությունն ազդում էր, հիմա դա չկա:
Նա առաջարկում է ՀՀ տեղական ինքնակառավարման մարմիններում ընտրելու իրավունքի նվազագույն տարիքային ցենզը սահմանել 16 տարին, ինչը հնարավորություն կտա ընդլայնելու երիտասարդության իրավունքները և մասնակցությունը տեղական ինքնակառավարմանը: Առաջարկներից մեկը համապատասխան օրենսդրական փոփոխություններով Հայաստանում տեղական ինքնակառավարման մարմինների մեկ միասնական օրվա սահմանումն է, մյուսը 6-10 հազար և ավելի բնակիչ ունեցող համայնքներում ավագանու ընտրություններն անցկացնել համամասնական ընտրակարգով, համայնքի ղեկավարի տեղակալի թեկնածությունը պետք է համայնքի ղեկավարի ներկայացմամբ հաստատի համայնքի ավագանին: 15 հազար և ավելի բնակիչ ունեցող համայնքները, Երիցյանի առաջարկով, կարող են ունենալ համայնքի ղեկավարի երկու տեղակալ, որոնցից մեկը՝ առաջին տեղակալի կարգավիճակով:
