Ֆրանսիացի հետազոտողները պարզել են, որ կապույտ լույսը ավտոմեքենայում օգնում է վարորդներին ղեկավարել հոգնածությունը երեկոյան վարելու ընթացքում: Իրականացված փորձը ցույց է տվել, որ ավտոմեքենայի սրահում կապույտ լույսը կարող է այնտեղ գտնվող մարդկանց վրա ազդել այնպես, ինչպես սուրճը: Այս մասին հաղորդում է Vesti-ին:
Հետազոտությունը իրականացրել են Բորդոյի համալսարանի գիտնականները և նրանց շվեդ գործընկերները: Փորձի շրջանակներում հավաքվել էին 48 տղամարդ-վարորդներ, ովքեր պետք է 400 կմ երթևեկեին երեք գիշերվա ընթացքում: Դրա հետ մեկտեղ թույլ էր տրվում կանգառներ իրականացնել 15 րոպեով միայն ճանապարհի կեսին: Փորձարարական ավտոմեքենայի մեջ կապույտ լուսադիոդային լամպ են տեղադրել:
Վարորդների մի մասը միացրել են լամպը, մյուս մասը սուրճ է խմել: Ընդ որում, որոշ վարորդների բաժին է հասել սուրճ առանց կոֆեինի, որի մասին նրանք չեն իմացել: Այս կերպ ստուգվել է նաև պլացեբոյի արդյունավետությունը:
Փորձի արդյունքները ցույց են տվել, որ կապույտ լույսը նույնքան լավ է ազդում վարորդների վրա, որքան սուրճը: Թարմացնող ըմպելիքի վատն այն է, որ այն ազդում է միայն որոշ ժամանակով, իսկ կապույտ լույսը հնարավոր է չանջատել ամբողջ ճանապարհի ընթացքում:
Գիտնականները նաև գնահատել են վարորդների պահվածքը ճանապարհի ընթացքում: Այն վարորդները, ովքեր կապույտ լույսով էին թարմանում, անցել են արգելված գծի վրայով 15 անգամ, իսկ սուրճով «փրկվածները»՝ 13: Ամենաանուշադիրը եղել են առանց կոֆեինի սուրճ խմած վարորդները:
Փորձագետները համարում են, որ կապույտ լույսի ուժը նրանում է, որ այն որոշակի կերպով է ազդում ուղեղի բջիջների վրա, բացի այդ, այն ճնշում է ազդեցությունը մելատոնինի՝ այն հորմոնի, որը քնելու ցանկություն է առաջացնում: Գիտնականները համոզված են, որ կապույտ լույսի գրագետ կիրառումը կօգնի նվազեցնել ավտոճանապարհային վթարների թիվը:
