Ամերիկացի դերասանուհի և երգչուհի Ջենիֆեր Լոպես այսօր Ինդոնեզիայի մայրաքաղաք Ջակարտայում կայանալիք համերգին բեմ դուրս կգա ավելի քիչ բացվածք ունեցող հագուստներով` համապատասխանելու համար մուսուլմանական հասարակության սովորույթներին և ավանդույթներին: Այս մասին հայտարարում է RIA Novosti-ն՝ հղում կատարելով նրա ինդոնեզական շոուի կազմակերպիչներին:
Jakarta Post պարբերականի փոխանցմամբ` ինդոնեզական Stellar Indonesia փրոմոութեր ընկերության ներկայացուցիչները հայտնել են, որ հայտնի երգչուհու բաց հագուստները որոշակի ձևափոխման են ենթարկվել Ջակարտայում ելույթից առաջ:
«Նրա մենեջերները մեզ հարցրել են՝ կարո՞ղ է նա կատարել իր սեքսուալ շարժումներով պարերը, և մենք պատասխանել ենք՝ դա անթույլատրելի է Ինդոնեզիայի համար»,- մեջբերում է թերթը Stellar Indonesia-ի ներկայացուցիչ Ռեզա Պրավիրոյի խոսքերը: Նա նաև ասել է, որ չնայած փոփոխություններին` Dance Again World Tour տուրի շրջանակներում անցկացվող շոուն կլինի իսկապես «աստղային»:
