Դեկտեմբերի 1-ը ՁԻԱՀ-ի դեմ պայքարի համաշխարհային օրն է: 2011-2015թթ. ՁԻԱՀ-ի դեմ պայքարի համաշխարհային օրն անցկացվում է «Հասնել զրոյի» կարգախոսով: Կարգախոսի կարևորությունն ընդգծված է ՄԱԿ-ի Գլխավոր ասամբլեայի 2011թ. հունիսին կայացած նիստում` ՄԱԿ-ի անդամ պետությունների կողմից ընդունված ՄԻԱՎ/ՁԻԱՀ-ի վերաբերյալ հռչակագրում, որին միացել է նաև Հայաստանը: Այս մասին այսօր լրագրողների հետ հանդիպման ժամանակ ասաց ՀՀ առողջապահության նախարարի տեղակալ Սերգեյ Խաչատրյանը՝ նշելով, որ այս հանրահայտ մոտեցումն իրականացնելու համար ՀՀ-ում մեծ աշխատանք է կատարվում:
Այս գործում, բանախոսի գնահատմամբ, մեծ է ՁԻԱՀ-ի կանխարգելման հանրապետական կենտրոնի դերը, որն իրականացնում է ՄԻԱՎ/ՁԻԱՀ-ի կանխարգելման պետական ծրագիր:
Սերգեյ Խաչատրյանի կարծիքով՝ ՀՀ-ում այս վարակի և հիվանդության կանխարգելման բազմաթիվ հաջողություններ են գրանցվել, թեև մարտահրավերներ դարձյալ կան, որոնք հաղթահարելու համար, նրա խոսքով, ավելի շատ կոնսոլիդացիա է անհրաժեշտ բոլոր սեկտորների կողմից:
Նախարարության աշխատակիցը հաջողություն համարեց այն հանգամանքը, որ 2007թ.-ից ի վեր Հայաստանում չի գրանցվել հղի մորից երեխային փոխանցման վարակի որևէ դեպք, 2001թ.-ին չեն գրանցվել նաև դոնորական արյան միջոցով վարակի փոխանցման դեպքեր: Ըստ նրա՝ առաջին հայացքից սա պարզ հաջողություն է, բայց այս ամենի ետևում երկարատև և նպատակաուղղված ծրագրային մեծ աշխատանք է՝ ուղղված ոչ միայն հղիների մոտ վարակի հայտնաբերմանը, այլև ամբողջ երկրով մեկ այս հիվանդության, այս վարակի դեմ նպատակաուղղված կոորդինացված աշխատանքին:
Սերգեյ Խաչատրյանի կարծիքով՝ հաջողություն է նաև ՀՀ-ում իրականացվող ռետրովիրուսային բուժումը, որն իրականացվում է բոլոր վարակված և հիվանդ այն մարդկանց մոտ, որոնք տալիս են իրենց համաձայնությունն ու ունեն ցուցումներ հակառետրովիրուսային բուժման:
«Բացի դրանից` այս կենտրոնում անվճար խորհրդատվության հնարավորություն ունեն այն մարդիկ, ովքեր դրա կարիքն ունեն: Մեծ նշանակություն ենք տալիս հիվանդության կանխարգելմանը: Սա այն ճանապարհն է, որով մենք կկարողանանք հաղթահարել այս խնդիրը և դիմակայել մարտահրավերներին:
Ունենք հաջողություններ, իսկ դրանք պահպանելու և հետագայում նոր հաջողությունների հասնելու համար մեզ անհրաժեշտ է ընդլայնել այն ծրագրերը, որոնք այսօր իրականացնում ենք: Այս առումով ԱՆ-ն Կանխարգելման կենտրոնի, միջազգային կազմակերպությունների հետ միասին նոր ռազմավարություն է մշակում, որն արդեն կառավարությունում շրջանառության մեջ է, և այն ընդունելուց հետո առաջիկա տարիներին կշարունակվեն այն ծրագրերը, որոնք այսօր իրականացնում ենք»,- մանրամասնեց Սերգեյ Խաչատրյանը:
Համատեղ ասուլիսի ընթացքում ՀՀ-ում ՄԱԿ-ի մշտական համակարգողի ժամանակավոր պաշտոնակատար Մանյա Հենրիետ Աարենսը բարձր գնահատեց Հայաստանում ՄԻԱՎ/ՁԻԱՀ-ի կանխարգելման ուղղությամբ իրականացվող աշխատանքը և արձանագրեց, որ Հայաստանն այս առումով տարածաշրջանում բավական լավ դիրքերում է:
