News Georgia-ի փոխանցմամբ՝ երեկ երեկոյան երկրորդ անգամ է ձերբակալվել Վրաստանի ՆԳՆ-ի գլխավոր տեսչության նախկին ղեկավար Թենգիզ Գունավան: Վերջինս օրեր առաջ մեղադրվել է թմրանյութերի ու զենքի պահպանման մեջ, սակայն դատարանի կողմից ազատ էր արձակվել 10,000 լարի (մոտ 6000 դոլար) գրավի դիմաց:
Գունավայի փաստաբան Մալխազ Վելիջանաշվիլին լրագրողներին երեկ հայտնել է, որ նա վերստին ձերբակալվել է, սակայն այս անգամ դա իրականացվել է նոր մեղադրանքով: Փաստաբանի խոսքերով՝ Գունավան երեկ հարցաքննության համար կանչվել է դատախազություն, ուր և նրան մեղադրել են 3000 լիտր բենզին յուրացնելու մեջ:
Գունավային մեղադրանք է ներկայացվել քրեական օրենսգրքի 333-րդ (ծառայողական լիազորությունների չարաշահում) և 186-րդ (յուրացում) հոդվածներով: Հետաքննությունը պարզելու է այդ վառելիքի ճակատագիրը, որը պետք է օգտագործվեր ծառայողական նպատակներով:
Թենգիզ Գունվան առաջին անգամ ձերբակալվել է նոյեմբերի 16-ին, նրա նկատմամբ մեղադրանք է ներկայացվել քրեական օրենսգրքի 236-րդ (հրաձգային զենքի, պայթուցիկ նյութերի ու սարքերի ապօրինի ձեռք բերում, պահպանում, կրում, փոխադրում, օգտագործում) և 260-րդ (թմրանյութերի և դրանց համարժեք նյութերի ապօրինի պատրաստում, ձեռք բերում, պահպանում, փոխադրում և օգտագործում) հոդվածներով:
