Ադրբեջանական Turanլրատվական գործակալության փոխանցմամբ՝Ադրբեջանի գծով ԵԽԽՎ համազեկուցողներ Պեդրո Ագրամունտը (Իսպանիա) և Ջոզեֆ Գրեշը (Մալթա), որոնք նոյեմբերի 26-28-ը գտնվել են Ադրբեջանում, երկրի իշխանություններին կոչ են արել ազատ արձակել բանտերում պահվող լրագրողներին, իրավապաշտպաններին ու քաղաքական ակտիվիստներին:
Համազեկուցողներն անհանգստություն են հայտնել ոչ վաղ անցյալում Ադրբեջանի Քրեական օրենսգրքում և Վարչական հանցանքների մասին օրենսգրքում կատարված ուղղումների կապակցությամբ, որոնց համաձայն՝ բազմապատիկ անգամ մեծացվել են չարտոնված ցույցերի կազմակերպման ու մասնակցության համար սահմանված տուգանքները:
Համազեկուցողների կարծիքով՝ այդ ուղղումները, Բաքվի կենտրոնում իշխանությունների կողմից ակցիաներ անցկացնելու մշտական արգելքի հետ մեկտեղ, էլ ավելի բացասական ազդեցություն են ունենում Ադրբեջանում ազատ արտահայտվելու ու ազատ հանրահավաքներ անցկացնելու վրա: Համազեկուցողներն իրենց անհանգստությունն են հայտնել նաև ազատազրկման մեջ գտնվող իրավապաշտպանների, ակտիվիստների ու լրագրողների մեծ թվի կապակցությամբ, որոնք ձերբակալվել են քրեական մեղադրանքներով:
Համազեկուցողներն Ադրբեջանի իշխանություններին կոչ են արել ազատ արձակել այդ անձանց, որոնց ազատազրկման մեջ պահելը հիմնավոր կասկած ու մտահոգություն է առաջացնում Ադրբեջանում խոսքի ազատության, ինչպես նաև դատական իշխանության անկախության մասին:
Համազեկուցողներն իրենց զեկույցի վերջնական տարբերակը և բանաձևի նախագիծը Մոնիթորինգային կոմիտեի դիտարկմանն են ներկայացնելու այս տարվա դեկտեմբերի 12-ին: Ընդունվելու դեպքում, այդ երկու տեքստերն էլ հրապարակվելու և քննարկվելու են ԵԽԽՎ-ի հունվարյան նստաշրջանի ժամանակ:
Համազեկուցողներն Ադրբեջանում հանդիպումներ են ունեցել նախագահի, խորհրդարանի խոսնակի, արտաքին գործերի, ներքին գործերի ու արդարադատության նախարարների, Գերագույն դատարանի նախագահի, գլխավոր դատախազի, խորհրդարանում ներկայացված քաղաքական կուսակցությունների առաջնորդների, ինչպես նաև քաղաքացիական հասարակության ներկայացուցիչների հետ: Բացի այդ, նրանք այցելել են Բաքվի թիվ 9 բանտ:
