Ռուսական Regnum լրատվական գործակալության փոխանցմամբ՝Ադրբեջանի կառավարության պաշտոնաթերթ «Ադրբեջան» թերթը Ռուսաստանի իշխանություններին մեղադրել է արևմտյան մամուլում Ադրբեջանի նախագահ Իլհամ Ալիևի ու նրա ընտանիքի անդամների դեմ հոդվածներ պատվիրելու մեջ:
Հոդվածի հեղինակ, AzTV պետական հեռուստաալիքի հաղորդավար Իբրահիմ Մամեդովը համոզված է, որ արևմտյան մամուլում բոլոր բացասական հոդվածները հրապարակվում են Ռուսաստանի պատվերով.
«Հաշվի առնելով, որ Ադրբեջանի իշխանություններին ամենաշատ քննադատող բրիտանական The Independent թերթի սեփականատերը ռուս գործարար Ալեքսանդր Լեբեդևն է, ապա զարմանալի չէ, որ այդ բոլոր հրապարակումների հետևում կանգնած է հենց Ռուսաստանը: Լեբեդևը Կրեմլին մոտ կանգնած մարդ է, ուստիև պատահական չէ, որ Ադրբեջանի համար բոլոր բացասական նյութերի մեծ մասը հայտնվում է հենց այդ թերթում:
Ադրբեջանի վրա այդօրինակ հարձակումների պատճառը երկրի ազգային շահերի պահպանման հարցում նախագահ Իլհամ Ալիևի որդեգրած անզիջում դիրքորոշումն է»:
Հիշեցնենք, որ «Ռուսաստանի ադրբեջանական կազմակերպությունների միության» ստեղծումից հետո Մոսկվայի ու Բաքվի միջև հարաբերություններում լարվածությունը հասել է իր գագաթնակետին: Բաքուն բաց տեքստով Ռուսաստանին մեղադրում է Ադրբեջանում իրավիճակի անկայունացման փորձերի մեջ: Ցայժմ Ադրբեջանի իշխանությունների վերահսկողության տակ գտնվող ԶԼՄ-ները երբեք այդպիսի կտրուկ մեղադրանքներ չեն ներկայացրել Ռուսաստանին:
