Աֆղանստանից դուրս է բերվել երկրի խոշորագույն Kabul Bank-ում ապօրինի ստացված 861 միլիոն դոլար: Ընդ որում՝ դրանց մի մասը փոխադրվել է Pamir Airways ինքնաթիռներով` սննդի համար նախատեսված կոնտեյներներում: Այս մասին հաղորդում է Associated Press գործակալությունը՝ վկայակոչելով բանկում տիրող կաշառակերության մասին զեկույցը, որը կազմվել է Արժույթի միջազգային հիմնադրամի պատվերով:
Ինչպես հաղորդում է գործակալությունը, օդաչուներին փոխադրմանը մասնակցելու համար վճարել են 320 հազար դոլար՝ դուրս գրելով որպես օդաչուների աշխատավարձ 2008թ. մարտից-2010թ. նոյեմբերի համար:
Գողացված գումարի մեծ մասը փոխանցվել է էլեկտրոնային ճանապարհով` 2007թ. մարտից մինչև 2011թ. ընկած ժամանակահատվածում: Արդյունքում այդ գումարները նստել են 19 մասնավոր անձանց և աշխարհի ավելի քան 20 երկրների ընկերությունների հաշվեհամարներին: Բացի այդ 66 միլիոն դոլար ծախսվել է աշխատակիցներին մեքենաներ, բոնուսներ և աշխատավարձ տալու համար, որոնք իրականում չեն աշխատել Kabul Bank-ում:
Հաշվետվության համաձայն՝ բանկում իրականացվել է երկակի փաստաթղթային գործողություն. մեկը՝ կեղծ ֆինանսական հաշվետվությունների համար, մյուսը՝ իրական, որում արտացոլված են բոլոր մեքենայությունները: Գումարները բանկից դուրս են բերվել կեղծ վարկերի օգնությամբ, որոնք երբեք չեն վճարվել:
Բանկին հասցված ընդհանուր վնասի չափը համադրելի է Աֆղանստանի ՀՆԱ 5%-ին:
Կաշառակերության այս օրինակը խոշորագույններից մեկն է աշխարհի բանկային ոլորտում:
