Ria Novosti-ի փոխանցմամբ՝ ԱԷՄԳ-ը դեռ չի կարող որոշել Իրանի միջուկային ծրագրի բնույթը, ավելի կոնկրետ ասած՝ միջուկային ծրագրի ռազմական բնույթ ունենալ-չունենալը: Այս մասին Վիեննայում տեղի ունեցած ԱԷՄԳ-ի ժողովում հայտարարել է ԱԷՄԳ-ի ղեկավար Յուկիա Ամանոն:
Վերջինիս խոսքերով՝ որևէ կոնկրետ արդյունք ձեռք չի բերվել տվյալ ոլորտում: Ամանոն Իրանին կոչ է արել առանց հետագա ձգձգումների միջազգային տեսուչներին թույլ տալ մուտք գործել «Փարչին» ռազմաբազա, ուր կասկածներ կան, թե տարվում են միջուկային օբյեկտների վերացման աշխատանքներ:
Յուկիա Ամանոն դեռևս սեպտեմբերի սկզբին էր Իրանից պահանջել ապահովել ԱԷՄԳ-ի փորձագետների անխափան մուտքը «Փարչին»: Պլանավորված է, որ Իրանի ու ԱԷՄԳ-ի միջև բանակցությունների հերթական փուլը տեղի է ունենալու դեկտեմբերի 13-ին Թեհրանում:
