Ավստրալիայի ոստիկանությունը բացահայտել է խաբեբաների ավազակախումբ, որը հիմնականում բաղկացած է Ռումինիայի քաղաքացիներից: Վերջիններս յուրացրել են 30 հազար ավստրալացու անձնական տվյալներ, ու դրանք օգտագործել են կեղծ կրեդիտ քարտեր պատրաստելու համար:
Ինչպես հաղորդում է RIA Novosti-ն՝ հղում կատարելով Fairfax Media-ին, չարագործներին հաջողվել է կոտրել Ավստրալիայի մանր բիզնեսի ավելի քան 100 ձեռնարկությունների համակարգիչներ ու մատչում ստանալ նրանց հաճախորդների տվյալներին:
Ստացված տեղեկությունը հանցագործները օգտագործել են կեղծ կրեդիտ քարտերի ստեղծելու համար: Ընդհանուր առմամբ՝ խաբեբաները կարողացել են կատարել ավելի քան 30 մլն դոլարի ֆինանսական օպերացիաներ: Քարտերն օգտագործվել են ԱՄՆ-ի, Եվրոպայի, Հարավային Կորեայի ու Հոնգկոնգի տարածքում:
Ավստրալիայի ու Ռումինիայի ոստիկանության համատեղ օպերացիայի արդյունքում ավազակախմբի 16 ենթադրյալ անդամները կալանավորվել են, ևս 7-ի նկատմամբ դատարանն արդեն մեղադրանք է առաջադրել: