Չինաստանի կրթության նախարարությունը կաշառակերության դեմ պայքարի շրջանակներում դասավանդողների նկատմամբ մի շարք միջոցառումներ է սկսել, այդ թվում՝ նաև արգելել է ուսանողներից և նրանց ընտանիքի անդամներից գումարային նվերներ ստանալ, ասվում է Չինաստանի կրթության նախարարության կայքում: Այս մասին է գրում RIA Novosti-ն:
Գերատեսչության կայքում հրապարակված փաստաթղթում նշված են այն կետերը, որոնք կիրառվելու են դասախոսական կազմի նկատմամբ: Այսպես, դասախոսներին արգելվում է ուսանողներից գումարային նվերներ ստանալ, մասնակցել ուսանողների կամ նրանց ընտանիքի անդամների կողմից կազմակերպված երեկույթներին, արարողություններին, ճանապարհորդություններին, դասախոսներն այլևս իրավունք չունեն ուսանողների անունից տպագիր պարբերականների բաժանորդագրվել, ինչպես նաև գրքեր, ամենօրյա օգտագործման իրեր և ապահովագրության փաթեթներ վաճառել: Վերջին կետում նշվում է, որ դասախոսներն իրավունք չունեն իրենց ծառայողական դիրքն օգտագործել տարբեր շահեր ստանալու համար:
Խախտումների հայտնաբերման դեպքում դասախոսը կազատվի աշխատանքից և պատասխանատվության կենթարկվի:
