ՀՀ Ազգային ժողովի փոխնախագահ Էդուարդ Շարմազանովը նոյեմբերի 28-ին ընդունել է Թուրքմենստանի Մեջլիսի նախագահի տեղակալ Կուրբանգուլ Բայրամովային: Ողջունելով տիկին Բայրամովայի այցն Ազգային ժողով, Էդուարդ Շարմազանովը նշել է, որ երկու երկրների հարաբերությունները միշտ էլ եղել են բարեկամական: Բարձր գնահատելով երկկողմ հարաբերությունների ներկա մակարդակը, նա համոզմունք է հայտնել, որ այս այցը նոր թափ կհաղորդի փոխգործակցությանը, որի համար առկա է լայն դաշտ:
ՀՀ ԱԺ հասարակայնության և տեղեկատվության միջոցների հետ կապերի վարչությունից «Առաջին լրատվական»-ին հայտնում են, որ ԱԺ փոխնախագահն անդրադարձել է միջխորհրդարանական բարեկամական խմբերի գործունեությանը՝ նշելով, որ դրա աշխուժացումը կնպաստի երկու խորհրդարանների միջև հետագա համագործակցության խորացմանը:
Էդուարդ Շարմազանովը կարևորել է Թուրքմենստանի որդեգրած չեզոք դիրքորոշումը շատ հարցերում՝ համանման մոտեցում ակնկալելով նաև Լեռնային Ղարաբաղի հակամարտության առնչությամբ: Նա բարձր գնահատեց այն հոգատարությունը, որ ցուցաբերում են Թուրքմենստանի իշխանություններն այդ երկրում բնակվող շուրջ քսան հազար մեր հայրենակիցների հանդեպ:
Շնորհակալություն հայտնելով ջերմ ընդունելության համար, Կուրբանգուլ Բայրամովան Հայաստանի և Թուրքմենստանի հարաբերությունները որակեց որպես դինամիկ, դրականորեն զարգացող: Կարևորելով միջխորհրդարանական կապերի հետագա խորացման անհրաժեշտությունը՝ նա ընդգծել է նաև այն ներուժը, որն առկա է տնտեսական փոխգործակցության ոլորտում, մասնավորապես՝ էներգետիկ, քիմիական արդյունաբերությունների, գյուղատնտեսության բնագավառներում: Տիկին Բայրամովան հավաստիացրել է, որ Թուրքմենստանի չեզոքության քաղաքականությունն անփոփոխ է՝ համոզմունք հայտնելով, որ հակամարտությունների լուծումները նախ և առաջ պետք է գտնեն դրանցում ներքաշված կողմերը:
Երկուստեք ընդգծվել է համագործակցությունը միջազգային կառույցներում, քաղաքական, տնտեսական, կրթական, մշակութային, հումանիտար և այլ բնագավառներում:
