Ոստիկանության Կենտրոնի բաժինը նոր պետ ունի: Նախօրեի երեկոյան Սերոբ Հարությունյանը ներկայացվել է բաժնի անձնակազմին, իսկ երեկ արդեն անցել է աշխատանքի: «Հայկական ժամանակ»-ը գրում է, որ երեկ ՀՀ ոստիկանության Կենտրոնի բաժնի մոտ լարված մթնոլորտ էր: Շենքի մոտ հավաքված ոստիկանները, ի տարբերություն նախորդ օրերի, շշուկով էին խոսում կամ ընդհանրապես լուռ կանգնած էին:
«ՀԺ»-ն հայտնել էր, որ այս բաժնի կադրային լրջագույն փոփոխությունները կապված են նախօրեի գիշերը մայրաքաղաքի կենտրոնում և ԲՈԻՀ-երի մոտ՝ պատերին ու գետնին «Մի ենթարկվիր» գրությամբ` Սերժ Սարգսյանի վրան խաչ քաշած մի քանի հարյուր դիմանկարի հայտնվելու հետ: Թերթի ունեցած տեղեկություններով, ոստիկանները գիշերը մի քանի անգամ մոտեցել են ակցիայի հեղինակներին, բայց մթության մեջ չեն նկատել, որ դիմանկարներում Սերժ Սարգսյան է, և երևի սա է պատճառը, որ դրա մասին չեն զեկուցել ոստիկանության կենտրոնական բաժնի ղեկավարությանը: Իսկ առավոտյան, երբ պարզվել է, թե ում դեմքն է զարդարում երևանյան շենքերն ու փողոցները, ոստիկանությունը «խառնվել է իրար»: Երեկ «ՀԺ»-ն կարճ հեռախոսազրույց ունեցավ Կենտրոնի նորաթուխ ոստիկանապետ Սերոբ Հարությունյանի հետ:
– Պարոն Հարությունյան, ինչպե՞ս կմեկնաբանեք տեղեկությունները, որ ոստիկանության Կենտրոնի բաժնի նախկին պետը և նրա տեղակալներն աշխատանքից ազատվել են նախօրեի գիշերը երևանյան փողոցներում և շենքերի վրա հայտնված Սերժ Սարգսյանի դիմանկարի հետևանքով, իսկ դուք այժմ նշանակվել եք այս պաշտոնին, որ ավելի խիստ հսկեք, ու նման բաներ այլևս չկրկնվեն:
– Ես նման տեղեկությունների չեմ տիրապետում: Կարող եք այդ հարցերով դիմել ոստիկանության լրատվական:
– Իսկ ինչի՞ հետ էր կապված ձեր նշանակումը, այն էլ` նման անսպասելի նշանակումը:
– Ես տեղյակ չեմ: Ես զինվորական մարդ եմ, եթե ինձ նշանակում են, ես պարտավոր եմ հրամանը կատարել:
– Դուք ոստիկան չե՞ք:
– Ոստիկան եմ:
– Ասացիք, որ զինվորական եք:
– Դե` հիմա:
– Երեկ երեկոյան Երևանի կենտրոնական փողոցներում ուժեղացված ծառայություն է իրականացվել, որ փողոցներում ու ԲՈԻՀ-երի մոտ նույն գրություններից ու դիմանկարներից չհայտնվեն: Ասում են, որ ոստիկանապետի պաշտոնում նշանակվելուն պես՝ դա ձեր առաջին հրամանն է եղել:
– Ես ձեզ ասացի, որ նման տեղեկությունների համար դիմեք լրատվական:
– Երեկ դուք հրահանգե՞լ եք, որ Երևանի կենտրոնում խստացված ծառայություն լինի:
– Ես ասեցի՝ դիմեք լրատվական ծառայություն:
– Ես ձեզ եմ հարցնում՝ նման հրահանգ տվե՞լ եք:
– Ես նման հրահանգներ չեմ տվել:
– Այդ դեպքում ո՞ւմ հրահանգով է երեկ խստացված ծառայություն եղել:
Այս հարցը լսելով` Սերոբ Հարությունյանն անջատեց հեռախոսը: «ՀԺ»-ն նորից զանգահարեց նրան: Այս անգամ ասաց, որ «մի քիչ խառն է», անձնակազմի հետ է հենց այդ պահին հանդիպում և մի փոքր ուշ կկարողանա պատասխանել հարցերին: Ավելի ուշ թերթի հեռախոսազանգերին նա, բնականաբար, չպատասխանեց: Այսպիսով, մի շարք հարցեր, օրինակ` արդյո՞ք իր նախորդների պես պատրաստվում է ընդդիմադիր ակտիվիստներին բերման ենթարկելու հրահանգներ տալ, կամ` արդյո՞ք նախորդներից ավելի խիստ է լինելու, մնացին անպատասխան:
Սերոբ Հարությունյանը, մինչ երեկվա հրամանը, ոստիկանության կազմակերպված հանցավորության դեմ պայքարի գլխավոր վարչության պետի առաջին տեղակալն էր: Նշենք, որ նա ոստիկանությունում է հայտնվել Վովա Գասպարյանի հետ միասին, այսինքն` անցած տարվա նոյեմբերին: Գասպարյանի հրամանով նա, նախ, նշանակվել էր «Զվարթնոց» օդանավակայանի ոստիկանության պետ, ընդամենը մի քանի ամիս անց տեղափոխվել էր Թմրամոլության դեմ պայքարի վարչություն (2-րդ վարչություն)` որպես պետ, երեք ամիս անց էլ, ինչպես նշեցինք ԿՀԴՊ ԳՎ (6-րդ) վարչության պետի առաջին տեղակալ:Ոստիկանության համակարգում հայտնվելուց առաջ Սերոբ Հարությունյանը զինվորական պաշտոներ է ունեցել, համարվում է Վովա Գասպարյանի «մարդը»:
