Երևանի քաղաքապետ Տարոն Մարգարյանը այցելել է «Նիկոլ Դուման» արտադրական ձուլարան, որտեղից ձեռք է բերվում քաղաքային կահավորումը՝ նստարաններ, աղբամաններ, լուսային հենասյուներ, ուղենշող ցուցանակներ:
Քաղաքապետը ձուլման գործընթացին ծանոթանալուց հետո լրագրողների հետ զրույցում նշեց, որ վերջին տարիներին համայնքային բյուջեի և մասնավոր հատված-քաղաքապետարան համագործակցության արդյունքում մայրաքաղաքում տեղադրվել են ավելի քան 3000 նստարաններ և 2000 աղբամաններ: Ըստ Տարոն Մարգարյանի՝ մայրաքաղաքի կահավորման դետալները հին հայկական ոճով են:
Լրագրողները քաղաքապետից հետաքրքրվեցին՝ արդյոք թանկ չե՞ն նստարանները՝ դրանք արժեն 186 հազար դրամ: «Քաղաքապետարանը գնում է մրցույթով՝ 165 հազար դրամով, և ես բազմիցս հայտարարել եմ՝ գործընթացը կատարվում է գնումների մասին օերնքով, իսկ եթե կլինեն այնպիսի ընկերություններ, որոնք կարող են ավելի էժան տրամադրել մեզ, մենք միայն կողջունենք և շնորհակալություն կհայտնենք»,- պատասխանեց քաղաքապետը՝ հավելելով, որ այլ երկրների փորձը ուսումնասիրելով՝ տեսնում ենք, որ անգամ հարևան երկրից ձեռք բերելը կրկնակի թանկ է արժենում:
Քաղաքապետը նաև ընդգծեց, որ մայրաքաղաքում առաջիկայում կավելացվի աղբամանների թիվը: Արտադրամասում քաղապետարանին կահույք են նվիրել՝ ժամացույց, որը հետագայում կտեղադրվի համայնքներից մեկում:
«Առաջին լրատվական»-ը զրուցեց նաև ձուլարանի աշխատակիցների հետ: Նրանց մտահոգությունները կապված են աշխատավարձի և շոգի հետ: Այստեղ աշխատավարձերը հասնում են մինչև 160 հազար դրամի, բայց աշխատակիցները շեշտեցին, որ իրենց աշխատանքը չափազանց բարդ է, առողջության տեսանկյունից էլ՝ ռիսկային:
Առավել մանրամասն՝ տեսանյութում:
