Հայոց համազգային շարժում կուսակցության անդամ, ԱԺ պատգամավոր Ալեքսանդր Արզումանյանի կարծիքով՝ ողջունելի է այս տարվա ընթացքում բազմաթիվ քաղաքացիական նախաձեռնությունների առաջացումը: Այս մասին նա ասաց լրագրողների հետ հանդիպման ընթացքում՝ հավելելով, որ իր հույսը հենց այս նախաձեռնությունների էլ ավելի աշխուժացումն է:
«Մայիսից սկսած՝ քաղաքական ուժերը թեժ աշուն են սպասում՝ մասնավորապես քառյակի ֆորմատով: Մի տպավորություն է. բոլորը մտահոգ են քաղաքական դաշտի լղոզմամբ: Կա նաև վտանգավոր մի բան. շինծու խանդ՝ քաղաքականի ու քաղաքացիականի միջև: Բոլորս պայքարում ենք Հայաստանի ինքնիշխանության կորստի դեմ. պետք է մի կողմ դնել խանդի դրսևորումները:
«Առաջին լրատվական»-ի հարցին, թե իրեն որևէ կերպ տեսնո՞ւմ է թեժ աշնանը խոստացված քառյակի հանրահավաքներում, Արզումանյանը պատասխանեց. «Քառյակի ֆորմատով չեմ տեսնում որևէ բան: Մեզ համար անհասկանալի ու անընդունելի է այն, որ «ընդդիմադիր» ձևակերպումը կուսակցությունները հանում են քաղաքական բառապաշարից: Անհասկանալի են նաև ոչիշխանական ուժերի լղոզված պահանջները: Կան ուժեր, որ մշտապես խոսում են այն մասին, որ առանց ամբողջական իշխանափոխության՝ բան չի փոխվի, և իրենց իսկ բնութագրած ավազակապետությունից պահանջում են ինչ-որ բաներ անել»:
Միևնույն ժամանակ բանախոսն ասաց, որ ինքը՝ որպես քաղաքացի, լինելու է ցանկացած միջոցառմանը՝ լինի ցույց կամ հանրահավաք: «Որպես շարքային մասնակից մենք չենք խորշում նման փորձից»,-ասաց նա:
Մեր հաջորդ հարցին, թե պատկերացնո՞ւմ է որևէ տեսակի համագործակցություն երկրորդ նախագահ Ռոբերտ Քոչարյանի հետ՝ հաշվի առնելով, որ օր օրի ընդլայնվում է նման ցանկություն ունեցող քաղաքական ուժերի և գործիչների քանակը, Արզումանյանը պատասխանեց. «Ինքը՝ Ռոբերտ Քոչարյանը, լավ կանխատեսել էր՝ որպես երիտասարդ թոշակառու: Մաղթում եմ, որ վայելի թոշակը: Մանավանդ հաշվի առնելով, որ նա հավելյալ գումարներ կուտակել է տարիների ընթացքում, հիմա էլ մենք տեսնում ենք իր պաշտոնավարման տասը տարիների արդյունքը:
Հայ ժողովրդի կամ հասարակության ընտրողի հիշողությունը կարճ չէ, և նա չի մոռանում Քոչարյանի գործունեությունը: Մեր կուսակցությունը չի պատկերացնում համագործակցության որևէ եզր Ռոբերտ Քոչարյանի հետ»,- եզրափակեց նա:
