Այցով Ադրբեջան է ժամանել Հարավային Կովկասի և Կենտրոնական Ասիայի հարցերով ՆԱՏՕ-ի գլխավոր քարտուղարի հատուկ ներկայացուցիչ Ջեյմս Ափաթուրայը: Բաքվում երեկ կայացել է Աֆղանստան 30 ադրբեջանցի զինծառայողներին ուղարկելու արարողությունը: Սա Աֆղանստանում անվտանգության աջակցման միջազգային ուժերի կազմում խաղաղարար օպերացիային մասնակցող զինվորների պլանային ռոտացիա է:
Խաղաղության աջակցման օպերացիաներին Ադրբեջանը սկսել է մասնակցել 2002 թվականի նոյեմբերի 20-ից: ՊՆ-ի տվյալներով՝ այսօր Աֆղանստանում ծառայում են 90 ադրբեջանցի զինծառայողներ և երկուական ռազմական բժիշկ ու ինժեներ:
Սակայն միայն դրանով Բաքվի համագործակցությունը կոալիցիոն ուժերի, մասնավորապես ՆԱՏՕ-ի հետ, չի սահմանափակվում:
Աֆղանստանում օպերացիայի գրեթե առաջին օրերից Ադրբեջանն օդային միջանցք է տրամադրել ՆԱՏՕ-ի ուժերի ռազմական բեռների փոխադրման համար: Ներկայում բոլոր այդ աշխատանքները կատարվում են պատշաճ մակարդակով, ինչի կապակցությամբ դաշինքի ղեկավարությունը բազմիցս երախտագիտություն է հայտնել պաշտոնական Բաքվին: Երեկ այդ միտքը կրկին հնչեցրել է այցով Բաքվում գտնվող Ափաթուրայը՝ գրում է «Նեզավիսիմայա գազետան»:
Նախագահ Իլհամ Ալիևի հետ հանդիպման ժամանակ, բարձր գնահատելով ՆԱՏՕ-ի և Ադրբեջանի միջև կապերը, Ափաթուրայը երախտագիտություն է հայտնել միջազգային անվտանգությունում Ադրբեջանի խաղաղապահների ներդրման համար: Նա հատուկ նշել է, որ Ադրբեջանը մեծ ներդրում ունի ՆԱՏՕ-ի գործունեությունում:
«Մենք դա գնահատում ենք և ցանկանում մեր ներդրումն անել Ադրբեջանում: Ձեր երկիրը շատ է օգնում Աֆղանստանին: Ադրբեջանի և Աֆղանստանի միջև շարունակվում է համագործակցությունը, ինչը ՆԱՏՕ-ի և Ադրբեջանի միջև լավ գործընկերության ակնհայտ օրինակ է»,- լրագրողներին հայտնել է Ափաթուրայը նախագահի հետ հանդիպումից հետո:
Այցի ընթացքում ՆԱՏՕ-ի գլխավոր քարտուղարի հատուկ ներկայացուցչին հայտնի է դարձել, որ ISAF-ի շրջանակում կանցկացվի ամփոփիչ ֆորում, որին կհրավիրվի նաև Ադրբեջանի ղեկավարությունը: Դրա հետ մեկտեղ որոշում է ընդունվել նաև նոր հարթակի շրջանակում Աֆղանստանի շուրջ Ադրբեջանի հետ համագործակցության շարունակման մասին: Թե իրենից ինչ է ներկայացնում նոր հարթակը՝ դեռևս չի հստակեցվում: Հայտնի է միայն, որ սկսվել է Աֆղանստանից ամերիկյան զորքերի և ոչ ռազմական բեռների դուրսբերման գործընթացը:
Տեխնիկայի մի մասը Եվրոպա է ուղարկվում Ադրբեջանի միջոցով:
Հարկ է նշել, որ Բաքուն ՆԱՏՕ-ի ռազմական հրամանատարության հետ բանակցությունների ընթացքում առաջարկել է Աֆղանստանից բեռները դուրս բերել Բաքու-Թբիլիսի-Կարս երկաթուղով, որը շահագործման կհանձնվի 2014-ի վերջին:
