«Առաջին լրատվական»-ն արդեն տեղեկացրել է, որ «Բարգավաճ Հայաստան» կուսակցությունը մի քանի հարյուր երիտասարդների է պահում, որոնցից յուրաքանչյուրը մի քանի կեղծ պրոֆիլներով ակտիվ գործունեություն են վարում Facebook սոցիալական ցանցում: Նրանք ակտիվ «քոմենթներ» են տեղադրում կայքում, երբ հանձնարարություն են ստանում իրենց կուսակցության այս կամ այն պատգամավորի քաղաքական մտքերը «ծաղկացնելու» կամ «լայքելու» համար: Եվ հակառակը՝ ակտիվ հարձակում են կազմակերպում ԲՀԿ-ի թիրախ հանդիսացող կուսակցությունների, գործիչների և պաշտոնյաների վրա:
Ճիշտ է, ԲՀԿ երիտասարդական միության ղեկավար Վահե Էնֆիաջյանը հերքել էր դա, սակայն հաստատել էր, որ իրենց երիտասարդներն ակտիվ են, ու ինքը հետևում է նրանց գործունեությանը: Մեր տեղեկություններով, սակայն, այդ երիտասարդներն իրենց բացահայտ ու կեղծ պրոֆիլներով գործունեության համար յուրաքանչյուր ամիս Գ. Ծառուկյանից ստանում են 120-150 հազար դրամ աշխատավարձ:
Ընդ որում, ԲՀԿ-ի այդ երիտասարդները երբեմն Facebook-յան մարտի են բռնվում Հանրապետական կուսակցության երիտասարդների հետ: Եվ դրանք երբեմն ԲՀԿ-ի կողմից ունենում են ուժի գործադրման սպառնալիքներ: «Առաջին լրատվական»-ը տեղեկություն է ստացել, որ վերջերս նման մի վիճաբանության արդյունքում Գ. Ծառուկյանի թիկնազորի պետը՝ Էդոն, զանգել է իրենց երիտասարդներից մեկին ու սպառնացել. «Խելոք մնա, թե չէ` կլոմեմ»:
ԲՀԿ-ն քարոզչության ոլորտում բավականին ընդարձակ կերպով օգտագործում է նաև կուսակցության նախագահ Գագիկ Ծառուկյանին պատկանող «Կենտրոն» հեռուստաընկերությունը, որտեղ «Առաջին լրատվական»-ի տեղեկություններով` գործում են ներքին բավականին խիստ կանոններ: Հատկապես լրատվական «Էպիկենտրոնի» և «Կենտրոնի» մյուս քաղաքական հաղորդումները խստորեն վերահսկվում ու գրաքննության են ենթարկվում:
Հեռուստաընկերության լրագրողների փոխանցմամբ` այն լրագրողը, ով Գ. Ծառուկյանին վերաբերող ռեպորտաժներում անխնա գովաբանում է ԲՀԿ ղեկավարին, նա աշխատավարձից բացի` պարգևատրվում է, իսկ այն լրագրողը, ով համեմատաբար թույլ դոզայով է գովաբանում, նրան տուգանում են: Այս առումով, ասում են, բավականին բարդ է «Էպիկենտրոնի» ղեկավար և մի քանի հաղորդումներ վարող Պետրոս Ղազարյանի վիճակը: Նա անընդհատ ստիպված է գովել, դրական լույսի ներքո ներկայացնել Գ. Ծառուկյանի ու ԲՀԿ-ի ցանկացած արարք և հաղորդումների ժամանակ անընդհատ բանախոսներից իրենց հակառակորդների մասին վատ մեկնաբանություններ պոկել:
Այս առումով, հասկանալի է, հաղորդումների թիրախը կառավարությունն է: Վերջերս նաև տեղեկություններ տարածվեցին, թե Պ. Ղազարյանը լրագրողներին հրաժեշտ է տվել և ասել, որ ինքն այլևս չի աշխատելու, իրեն ազատել են, քանի որ չի կարողացել բավարարել ԲՀԿ-ի ու նրա ղեկավարի պահանջները: Այն ժամանակ «Առաջին լրատվական»-ը փորձել էր Պ. Ղազարյանից մեկնաբանություն ստանալ իր ազատման փորձի մասին, բայց նա չէր ցանկացել մեկնաբանել: «Կենտրոնի» լրագրողների փոխանցմամբ` երբ հասկացել են, որ բացահայտվում են Պ. Ղազարյանի ազատման պատճառները, որոշել են այդ քայլին չգնալ և «Էպիկենտրոն»-ի ղեկավարին «շտկվելու» հնարավորություն տալ:
Պ. Ղազարյանի հաղորդումները դիտելիս հասկանալի է դառնում, որ նա արդեն այնքան է արդարացրել այդ հույսերը, որ իր վարած հաղորդումներից մեկի մասնակից` հրապարակախոս Տիգրան Հակոբյանը «դեմագոգիա» անվանեց նրա դիտարկումներից մեկը:
