Կրեմլում հաստատել են Ռուսաստանում Ջոն Տեֆտին ԱՄՆ դեսպան նշանակելու թույլտվությունը: Այս մասին լրագրողներին հայտնել է արտաքին քաղաքական հարցերով Ռուսաստանի նախագահի օգնական Յուրի Ուշակովը՝ փոխանցում է ITAR-TASS-ը:
«Այո,համաձայնություն տրվել է»,- ասել է նա:
Ուշակովն առանց մեկնաբանությունների է թողել «Տեֆտի վարքը, երբ նա աշխատել է Վրաստանում և Ուկրաինայում»: Դրա հետ մեկտեղ, նախագահի օգնականը փաստել է, որ Տեֆտը պրոֆեսիոնալ դիվանագետ է:
Կրեմլի ներկայացուցիչն ընդգծել է, որ Տեֆտը մասնագիտական առումով լավ է պատրաստված: «Այն, որ նա աշխատել է Ռուսաստանում, և որ լավ գիտի մեր երկիրն ու խոսում է ռուսերեն, դա նույնպես փաստ է»,- նշել է Ուշակովը: Երբ մի քանի ամիս առաջ Սպիտակ տունը սկսեց փոխարինող փնտրել Մայքլ Մակֆոլին, Տեֆտի թեկնածությունը կասկածներ առաջացրեց մտավախությունների պատճառով, որ նրա աշխատանքի փորձը նախկին խորհրդային հանրապետություններում, կվրդովվի Ռուսաստանին: Սակայն այժմ՝ Ուկրաինայի շուրջ իրավիճակի պատճառով ռուս-ամերիկյան հարաբերությունների սրումից հետո, ԱՄՆ-ը չի վախենում Կրեմլի արձագանքից՝ գրում է News York Times-ը:
Փետրվարին նախկին դեսպանը հայտարարել էր հրաժարականի մասին: Նա իր որոշումը պատճառաբանել էր անձնական և ընտանեկան հանգամանքներով:
Նշենք, որ 1996-1999 թթ. Տեֆտը զբաղեցրել է Մոսկվայում ԱՄՆ դեսպանի տեղակալի պաշտոնը: