«Ես շարունակում եմ մնալ անվտանգության խորհրդի անդամ, որովհետև անվտանգության խորհուրդը խորհրդակցական մարմին է: Եվ ընդհանրապես, ես ունեմ 6-ամյա փորձառություն, 4 տարի եղել եմ ԱԺ նախագահ և այս ընթացքում ձեռք եմ բերել փորձառություն, կապեր, հնարավորություններ, և կապ չունի, թե ես որ դաշտում եմ գործում»,- այսօր իր ասուլիսի ժամանակ հայտարարեց ՕԵԿ առաջնորդ, ԱԱԽ նախկին քարտուղար Արթուր Բաղդասարյանը:
Հիշեցնենք, որ նա այդ պաշտոնը լքեց 3 ամիս առաջ, երբ հայտարարեց ընդդիմություն դառնալու մասին: Բաղդասարյանի հեռանալուց հետո այդ պաշտոնը դեռ թափուր է: Վերջինիս չի էլ հետաքրքրում, թե ով կլինի հաջորդ ԱԽՔ-ը:
Ամեն դեպքում, որպես ԱԽ անդամ, նախկին քարտուղար Բաղդասարյանն անդրադարձավ ԼՂՀ հիմնախնդրին, ԱՄՆ համանախագահների և դեսպանի կողմից տարածքների զիջման վերջին հայտարարություններին: Նա նշեց, որ ԼՂՀ հիմնախնդրի կարգավորման շուրջ մեծացող լարվածություն է նկատվում, և գտնում են, որ բանակցային գործընթացը պետք է ակտիվորեն քննարկվի՝ հասարակության համար ընդունելի մի բանաձև ընտրելու և բանակցային սեղանին դնելու համար:
Ինչ վերաբերում է ԼՂՀ-ում ռուս խաղաղապահների տեղակայմանը, ապա Բաղդասարյանի խոսքով՝ խաղաղապահների տեղակայումը հնարավոր կլինի միայն հակամարտության ընդունելի կարգավորման պարագայում: «Քանի որ այսօր այդ լուծումը տեսանելի չէ, ապա ես հավանական չեմ համարում խաղաղապահների տեղակայումը»,- ասաց նա:
Ինչ վերաբերում է ԵՏՄ-ին Հայաստանի անդամակցությանը, ապա անվտանգության խորհրդի նախկին քարտուղարի կարծիքով՝ անդամակցման գործընթացը վերջնական տեսք կստանա թերևս միայն 2015թ. աշնանը, որի համար անհրաժեշտ է ուժեղ թիմ, որն այսօր չկա: «Ցավոք, եմ չեմ տեսնում այն բանակցող թիմը, որը կկարողանա արագ ոչ միայն այդ անդամակցությունն ապահովել, այլև նրա գործողության հետագա ընթացքը»:
Լուսանկարը` PAN Photo-ի