Երկուշաբթի կարճատև աշխատանքային այցով Վրաստան էր ժամանել ԵՄ Արտաքին քաղաքականության և անվտանգության հարցերով գերագույն ներկայացուցիչ Քեթրին Էշթոնը:
Բրյուսելում անհանգստություն են արտահայտում Վրաստանի նախագահ Սաակաշվիլիի և վարչապետ Իվանիշվիլիի միջև աճող դիմակայության առնչությամբ: Ընդ որում, հասնել առաքելության հաջողության, այն է՝ հաշտեցնել վրացական ղեկավարության առաջին դեմքերին, Էշթոնին չհաջողվեց: Այս մասին գրում է Kommersant-ը:
Թբիլիսիի օդանավակայանից բարոնուհի Էշթոնը ուղևորվեց Բիձինա Իվանիշվիլիի հետ հանդիպման, որն անցկացվեց դռնփակ: Աղբյուրի փոխանցմամբ՝ Էշթոնը կառավարության ղեկավարին հասկացնել է տվել, որ ԵՄ-ն ուշադիր հետևում է Վրաստանում տեղի ունեցող իրադարձություններին, այդ թվում նախագահի կողմնակիցների ձերբակալությունների, և կոչ արել զրուցակցին ընդհանուր լեզու գտնել Սաակաշվիլիի թիմի հետ՝ ապահովելու «իշխանության խաղաղ փոխանցում»:
Ի դեպ, Բիձինա Իվանիշվիլին նախկին պաշտոնյաների ձերբակալությունները ժողովրդավարական նորմերի խախտում չի համարում, քանի որ «դատախազությունը գործում է ինքնուրույն և օրենքի նորմերում»: Վարչապետը փորձել է հեռանալ Սաակաշվիլու թիմի հետ փոխհարաբերությունների թեմայից՝ փոխարենը խոստանալով, որ Թբիլիսին կկատարի բոլոր պարտավորություներն ազատ առևտրի և վիզայի ռեժիմի մեղմացման մասին ԵՄ-ի հետ պայմանագրի կնքման բանակցությունների շրջանակում:
Վրաստանի կառավարության ղեկավարը նաև խնդրել է Էշթոնին արագացնել այդ գործընթացը՝ մինչև 2013-ի աշնանը Լիտվայում կայանալիք «Արևելյան գործընկերության» գագաթնաժողովը պայմանավորվածություն ձեռք բերելու համար: Բացի այդ, Բիձինա Իվանիշվիլին անհրաժեշտ է համարել Աբխազիայի և Հարավային Օսիայի «չճանաչման» ԵՄ քաղաքականության շարունակումը:
Իվանիշվիլիի հետ հանդիպումից հետո Քեթրին Էշթոնը ուղևորվել է նախագահական պալատ, որտեղ նույնպես դռնփակ, շուրջ մեկ ժամ զրուցել է Միխեիլ Սաակաշվիլու հետ: Աղբյուրի տվյալներով՝ պետության ղեկավարը նրան գանգատվել է ձերբակալություններից՝ մեղադրելով Իվանիշվիլիին «անձնական շահերի հետապնդման մեջ»: Նա ևս խնդրել է արագացնել ԵՄ-ի հետ Վրաստանի մերձեցման գործընթացը:
Այցի արդյունքներով Էշթոնը կարճատև բրիֆինգ է ունեցել՝ հնչեցնելով մի քանի արտահայտություն ժողովրդավարական ինստիտուտների ամրապնդման և իշխանության խաղաղ փոխանցման գործընթացի անհրաժեշտության մասին՝ որպես ԵՄ-ի և Վրաստանի միջև համագործակցության խորացման պայման, ինչից հետո հեռացել է Թբիլիսիից:
