Միկոյանի արձանի տեղադրումից մինչև վճարովի ավտոկայանատեղիներ ու տարվա մեջ մի քանի անգամ ասֆալտապատվող փողոցներ: Երևանցիներին հուզող այս թեմաներով այսօր «Ազատություն»-ը խոսել է քաղաքապետ Տարոն Մարգարյանի հետ, ով Շենգավիթ համայնքում շրջայցի էր դուրս եկել:
Քաղաքացիական ընդվզումից հետո Միկոյանի արձանի տեղադրման թեման կարծես մարեց: Այսօր դեռևս հստակ պատասխան չկա՝ տեղադրվելո՞ւ է ի վերջո այն, թե՞ ոչ: Այս հարցն ուղղեցինք նաև քաղաքապետին, ով նախ հրաժարվեց պատասխանել` նշելով, որ բազմիցս է անդրադարձել այդ թեմային: Երկրորդ անգամ նույն հարցը հնչեցնելուց հետո Մարգարյանը անորոշ պատասխան է տվել․ – «Բազմիցս պատասխանել եմ, իմ կարծիքով բոլորդ լսել եք դրա մասին, Երևանի քաղաքապետարանը, Երևանի ավագանին ընդամենը տվել է իր համաձայնությունը: Համաձայնությունը տալուց հետո, երբ որ կփորձեն այդ արձանը տեղադրել, այդ ժամանակ արդեն միջնորդները, բարեկամները իրենց մասնակցությունը կունենան»:
Չնայած մայրաքաղաքում չեն դադարում բողոքի ցույցերը կարմիր գծերի ու վճարովի ավտոկայանատեղիների դեմ, այդուամենայնիվ քաղաքապետն այս հարցում անդրդվելի է: Պնդում է, թե դրանք պարտադիր պետք է լինեն. – «Ես չեմ ուզենա էդ հարցերին շատ անդրադառնալ, քանի որ դա իրենց անձնական կարծիքն է, բայց մեր քաղաքը գնում է դեպի զարգացման, և մենք բոլորս միասին պետք է կարողանանք ստեղծենք էդ հարմարավետությունը և այն մոտեցումները, որը ամբողջ զարգացած երկրների զարգացած քաղաքներում կա»:
…. Նրանից հետաքրքրվել են, թե ինչու քաղաքապետի պաշտոնը ստվերեց՝ թաղապետ եղած տարիներին իր հասցեին հնչող միայն դրական կարծիքները․ – «Ես էդքան էլ էդ կարծիքին չեմ, բայց ամեն դեպքում պետք է հարցնեք երևանցիներին, և ես միշտ հայտարարել եմ, որ ես երևանցիների կողքին եմ և իրենցից մեկն եմ, իրենց դարդ ու ցավը իմ դարդ ու ցավն է և ես ապրում եմ նաև իրենց խնդիրներով»:
Մանրամասները՝ «Ազատություն» ռադիոկայանի կայքէջում