Հայաստանի նախագահ Սերժ Սարգսյանը հուլիսի 5-ին տարածաշրջանային այցով մեկնել է Հարավային Ամերիկա։ Հանրապետության նախագահը հուլիսի 6-8-ը պաշտոնական այցով Արգենտինայում էր, որտեղ, ադրբեջանական կայքերի փոխանցմամբ, չնայած նախապես պլանավորված էր, չի հանդիպել Արգենտինայի նախագահ Քրիստինա Ֆերնանդես դե Քիրշների հետ:
«Առաջին լրատվական»-ի հետ զրույցում արգենտինահայ Գրիգոր Նահապետյանը պատմեց, որ իրականում ոչ թե Արգենտինայի նախագահը միտումնավոր չի ընդունել Սերժ Սարգսյանին, այլ նրա առողջական վիճակը անսպասելիորեն վատացել է: Նա նաև տեղեկացրեց, որ Արգենտինայում և առհասարակ ամբողջ աշխարհում գիտեն, որ տիկին Քիրիշները հիվանդ է և վաղը նույնիսկ չի կարող մասնակցել Արգենտինայի անկախության օրվան նվիրված միջոցառմանը:
Մեր զրուցակիցն ընդգծեց նաև, որ Սերժ Սարգսյանի բոլոր մնացած հանդիպումները տեղի են ունեցել բարձր մակարդակով:
Հայաստանի նախագահը հանդիպել է նաև արգենտինահայ գործարար Էդուարդ Էռնեկյանին: Վերջնիս հետ քննարկվել են հիմնականում տեղի հայերին վերաբերող հարցեր: Ավելի ուշ հանդիպում է եղել նաև արգենտինահայ համայնքի հետ: Համայնքը նախագահ Սերժ Սարգսյանին նվիրել է պետական իշխանության նախագահական գավազան: Այն նախագահին հանձնել է Հայ Առաքելական Սուրբ եկեղեցու Արգենտինայի հայոց թեմի առաջնորդ Տ. Գիսակ արքեպիսկոպոս Մուրադյանը: