Երեկ թիվ 1 ընտրատարածքում առաջադրված պատգամավորության թեկնածու, «Ժառանգություն» կուսակցության անդամ Ստյոպա Սաֆարյանը տեղեկացրեց, որ ամենաուշը վաղն առավոտյան ԿԸՀ-ին կդիմի` ՀՀԿ թեկնածուի գրանցումը չեղյալ համարելու համար: Ըստ նրա` դրա համար բավականին հիմքեր կան` շտաբների թվի գերազանցում, նախընտրական հիմնադրամում միջոցների անհամապատասխանություն ծախսերի շուկայական արժեքին: Ի պատասխան Aravot.am-ի հարցին, թե ի՞նչ ակնկալիքներ ունեք` ԿԸՀ-ն կբավարարի՞ Ձեր պահանջը, նա ծիծաղեց` ասելով, որ իր գործը դիմելն է և իր իրավունքները պաշտպանելը. «Որտեղ նայում ես, նախընտրական շտաբ է: Մոտենում, հարցնում ենք, ասում են` սա շտաբ չի, սա ենթաշտաբ է: Բայց հո շտաբը ճտեր չի՞ ունենում: Ամբողջ Ավանը, ամբողջ Նոր Նորքը պաստառապատված է: Պաստառները էժան հաճույք չեն: Միայն ՀՀԿ թեկնածուի պաստառների գումարը գերազանցում է այն գումարը, որը ցույց է տրվել: Ամեն մի պաստառը 200 հազար դրամի չափ է, ես գիտեմ գները»:
Երեկ Ստյոպա Սաֆարյանը նաև մի ուշագրավ բացահայտում է արել` ընտրացուցակների հետ կապված: 2012-ի մայիսի 6-ի համեմատությամբ ընտրողների թիվը ավելացել է մոտ 2000-ով. «Երկրում մարդ չի մեռնում, միայն ավելանում են, ընտրողների թիվը հասել է գագաթնակետին, երկնիշ աճ ենք արձանագրում` միայն ընտրողների առումով: Նկատելի են միտումնավոր ուռճացման ցանկությունն ու իրողությունը: Տուն կա` 25 չափահաս ընտրող է ապրում: Երեխաներն էլ հետը: Դե, պատկերացրեք էդ տան վիճակը, ինչքան էլ 3-4 հարկանի սեփական տուն լինի: Դա վերջն է»:
