Պաշտոնական հրադադարին հաջորդած նոր ահաբեկչությունների մեղքը կոլումբացի գրոհայինները բարդել են ԶԼՄ-ների վատ աշխատանքի վրա: Այս մասին հայտնում է BBC-ն: «Կոլումբիայի հեղափոխական զինված ուժերի» (FARC) անդամները հայտարարել են, որ չեն իմացել մարտական գործողությունների միակողմանի դադարեցման մասին, ինչը ավելի վաղ հայտարարել են FARC-ի ղեկավարները:
Երեքշաբթի՝ նոյեմբերի 20-ին, ապստամբները երկրի հյուսիսում պայթեցրել են էլեկտրամատակարարման երկու աշտարակներ: Միջազգային ԶԼՄ-ները օպերացիաների դադարեցման մասին FARC-ի որոշումը հաղորդել էին դրանից մեկ օր առաջ:
Այժմ ապստամբների առաջնորդները բանակցություններ են վարում Կոլումբիայի կառավարության հետ Կուբայում: Ապստամբների գլխավոր ներկայացուցիչ Իվան Մարկեսի խոսքով՝ դռնփակ բանակցությունները կշարունակվեն մինչև 2013-ի հունվարի 20-ը:
Դեռևս իշխանությունները չեն պատրաստվում զիջումների գնալ FARC-ի հետ: Պաշտպանության նախարար Խուան Կառլոս Պինսոնը հայտարարել է, որ կառավարությունը չի հավատում ապստամբների` զենքը վայր դնելու պատրաստակամությանը և կշարունակի օպերացիաները նրանց դեմ:
Կոլումբիայի պաշտոնական իշխանությունների և ձախ արմատական խմբավորման միջև առճակատումը շարունակվում է 1960-ականներից:
