Հայաստանի Հանրապետության վարչապետ Տիգրան Սարգսյանը հարցազրույց է տվել Interfax գործակալությանը, որում, ի թիվս այլ հարցերի, անդրադարձել է նաև սիրիական ճգնաժամին:
Սարգսյանը նշել է, որ սիրիական ճգնաժամն ազդում է Հայաստանում տիրող իրավիճակի վրա, և դրա համար կա մի քանի պատճառ: Առաջին հերթին, Սիրիան գտնվում է Հայաստանի անմիջական հարևանությամբ, և ավանդաբար երկու երկրների միջև ձևավորվել են լավ հարաբերություններ: Որպես երկրորդ պատճառ՝ Սարգսյանը նշել է Սիրիայի հայ համայնքը:
«Այս հարցը մեզ շատ է անհանգստացնում: Մենք պարտավոր ենք քայլեր ձեռնարկել, որոնք ինչ-որ չափով կթեթևացնեն այն բեռը, որն այժմ կրում է մեր հայ համայնքը: Մենք փորձում ենք օգնել նրանց եղած հնարավորությունների չափով»,- ընդգծել է ՀՀ վարչապետը:
Տ. Սարգսյանի խոսքերով՝ Սիրիայից Հայաստան են տեղափոխվել 5-6 հազար հայեր, «որոնց մեծ մասը միջին խավի ներկայացուցիչներ են, Սիրիայում կորցրել են իրենց բիզնեսը, եկամուտները և ստիպված են ամեն ինչ սկսել զրոյից»: Վարչապետը նշել է, որ իրենք փորձում են աջակցել նրանց այս հարցում:
