Փարիզում նոյեմբերի 25-ին մեկնարկել է հայկական երաժշտության շաբաթը: Ֆրանսիացի երաժշտասերները հնարավորություն ունեն ունկնդրելու հայկական դասական երաժշտություն, ջազ, ժողովրդական գործիքների կատարումներ ու դրանք քննարկել երաժշտական քննադատների հետ հանդիպումների ընթացքում: «Սիտե դե Մյուզիք» երաժշտական սրճարանում կայացել է առաջին հանդիպում-ծանոթությունը հայ դաշնակահար, ջազմեն Տիգրան Համասյանի հետ` չնայած նա անձամբ ներկա չի գտնվել հանդիպմանը: Այս մասին տեղեկացնում է Միջազգային ֆրանսիական ռադիոյի ռուսական ծառայությունը:
Ֆրանսիացի երաժշտասերները քննադատների հետ երեկ առավոտյան ունկնդրել են Տիգրան Համասյանի կատարումները, ծանոթացել նրա ստեղծագործությանը:
24-ամյա Համասյանին վիրտուոզ են անվանում նրա կատարման տեխնիկայի, ռիթմիկ ճշգրտության համար: Համասյանը ֆրանսիացի ունկնդիրներին հետաքրքրել է առաջին հերթին իր յուրօրինակությամբ` նա ջազի հետ ներդաշնակորեն միահյուսում է ավանդական հայկական երաժշտությունը:
«Ես հուզված եմ նրա ստեղծագործություններով, նրա կատարմամբ: Նրա երաժշտությունն ինձ շատ է ոգեշնչում: Ես գիտեի նրա ծագման մասին: Առաջին անգամ, երբ լսեցի Տիգրան Համասյանին, այդ ժամանակ նրա համերգը նվիրված էր հայկական ժողովրդական երաժշտությանը: Ինձ շատ է դուր գալիս դուդուկի զուգակցումը նրա ստեղծագործություններում: Այդ գործիքի ձայնը շատ հարուստ է, ինչպես մարդկային ձայնը»,- ռադիոն մեջբերում է Համասյանի երկրպագուներից մեկի խոսքերը:
«Ես բացահայտեցի Տիգրան Համասյանին: Նրա երաժշտությունը շատ բազմակողմանի է՝ տարբեր մոտիվներով: Ես դեռ այնքան էլ լավ ծանոթ չեմ երաժշտի հետ, սակայն նրա ստեղծագործություններում առկա են և Հայաստանը` ավանդական մոտիվներով, և ինչ-որ արմատական, ժամանակակից բան: Սակայն ամեն ինչ շատ է հավասարակշռված: Ես այսօր նրա կատարման մեջ լսեցի նաև ռոք, դասական՝ շատ պոետիկ, անգամ ռոմանտիկ»,- ասել է երաժշտասերներից Էլենա դե Անջելիսը, ով առաջին անգամ է ունկնդրել Համասյանին:
Համասյանին Ֆրանսիայում գիտեն 2003-ից: Այն ժամանակ նա 3-րդ տեղն էր զբաղեցրել Փարիզի ջազային դաշնակահարների միջազգային մրցույթում:
Այդ ժամանակից ի վեր նա Ֆրանսիայում պարբերաբար ելույթներ է ունենում: Համերգներից մեկի ժամանակ Տիգրանը հանդես է եկել ֆրանսիական ջազի լեգենդ Դանիել Յումերի հետ:
Համասյանի առաջին ալբոմը թողարկվել է ֆրանսիական Nocturne Records ձայնագրման ընկերության կողմից, իսկ «Ջանգո» հեղինակավոր մրցանակի հանձնման արարողությանը, որը կազմակերպվել էր «Շաթլ» սրահում` Ջազի ֆրանսիական ակադեմիայի կողմից, կայացել էր այն ժամանակ 19 տարեկան Համասյանի համերգը:
Երաժշտական քննադատ Իվան Ամարի խոսքով` երիտասարդ երաժիշտը գիտի՝ ինչ է ուզում, ու ջազի աշխարհ է բերում ինչ-որ նորություն:
«Իհարկե, մենք նրա ստեղծագործություններում գտնում ենք նաև Հայաստանը: Հաճելի է լսել ջազի ու ժողովրդական մոտիվների հաջող համադրություն. մենք լսում ենք ավանդական հայկական մոտիվներ: Նաև լսում ենք դաշնամուրի ու դուդուկի երկխոսություն: Ես կարծում եմ, որ այդ գործիքը լավագույնս է ներկայացնում Հայաստանը»,- ասել է նա:
Համասյանի համերգը փարիզյան «Սիտե դե լա Մյուզիք»-ում կկայանա դեկտեմբերի 1-ին:
