Ղարաբաղյան հիմնահարցի լուծման համար միջնորդները նոր մոտեցումներ պետք է ներկայացնեն հակամարտող կողմերին: Այսօր «Առաջին լրատվական»-ի հետ զրույցում այս մասին ասաց LՂՀ արտաքին քաղաքականության և անվտանգության հանրային խորհրդի նախագահ Մասիս Մայիլյանը՝ խոսելով ԵԱՀԿ Մինսկի խմբի համանախագահների Հայաստան, ԼՂՀ կատարած այցից և հնչեցրած հայտարարություններից:
Մասիս Մայիլյանը վերահաստատեց իր տեսակետն այն մասին, որ ԵԱՀԿ Մինսկի խմբի միջնորդական քաղաքականությունըպետք է փոխի իր մոտեցումները, քանի որ ներկայիս մոտեցումներով առաջնորդվելու դեպքում գործընթացից որևէ արդյունք ակնկալել չի կարելի: «Մինսկի խմբիպաշտոնական հաղորդագրություններից, հանդիպումներից չի երևում, որ իրենք նոր մոտեցումներ են փորձում ցուցաբերել»,- նկատեց նա:
Մասիս Մայիլյանը նշեց, որ Սաֆարովի գործից հետո ՀՀ իշխանությունները հնարավորություն ունեին դադարեցնել ՀՀ մասնակցությունը Մինսկի գործընթացում նախապայմանով`երաշխավորել Արցախի անվտանգությունը, սակայն նման բան չեղավ: «Առանց նախապայմանների հանդիպում տեղի ունեցավ երկու երկրների արտգործնախարարների մակարդակով: ԵԱՀԿ Մինսկի խմբի միջնորդությամբ հանդիպումներն այլ մակարդակներով կարող են արդյունավետ լինել, եթե միջնորդները երեք կողմերին նոր մոտեցումներ ներկայացնեն` միջազգային իրավական իրողություններինհամապատասխան»,- տեսակետ հայտնեց Մասիս Մայիլյանը՝ նկատելով, որ բանակցային գործընթացը պասիվ փուլում է՝ պայմանավորված անցած և դեռ սպասվելիք նախագահական ընտրություններով ՌԴ-ում, Ֆրանսիայում, ԱՄՆ-ում, Արցախում, ՀՀ-ում և Ադրբեջանում:
«Հակամարտող կողմերի միջև հրադադարը հիմնված է կողմերի ռազմական հավասարակշռության վրա և որևէ առնչություն չունի բանակցային գործընթացի ակտիվության հետ»,- եզրափակեց իր խոսքը Մասիս Մայիլյանը:
Հիշեցնենք, որ նախօրեին Երևանում տեղի ունեցավ արտգործնախարար Էդվարդ Նալբանդյանի և ԵԱՀԿ Մինսկի խմբի համանախագահների հանդիպումը: Նախորդ օրը նմանատիպ հանդիպում էր տեղի ունեցել ԼՂՀ-ում: ԵԱՀԿ Մինսկի խմբի ՌԴ համանախագահ Իգոր Պոպովն ասել էր, որ առաջիկայում երկու երկրների նախագահների մակարդակով հանդիպում չի նախատեսվում:
