Բրիտանացի ամուսինները զրկվել են իրենց որդեգրած երեխաներից բրիտանական Անկախության կուսակցությանը անդամակցելու պատճառով, որը հանդես է գալիս Եվրոգոտուց Մեծ Բրիտանիայի դուրս գալու օգտին: Այս մասին տեղեկացնում է BBC-ի ռուսական ծառայությունը:
Ռոտերհեմի քաղաքային խորհուրդը երեխաներին նրանցից վերցնելու որոշումը բացատրել է երեխաների ապագայի նկատմամբ հոգատարությամբ: Խորհուրդը հայտարարել է, որ UKIP-ի դիրքորոշումը ներգաղթյալների հարցով հակասում է այն հանգամանքին, որ որդեգրված երեխաները բնիկ սպիտակամորթ բրիտանացիներ չեն:
Ծնողները, որոնց անունները չեն հրապարակվում, իրենց հերթին սոցաշխատակիցներին մեղադրել են, որ իրենց ռասիստ են համարել միայն այն բանի համար, որ իրենք անդամակցում են UKIP-ին:
Այն պահին, երբ սոցաշխատակիցները ինչ-որ հավակնություններ են ներկայացրել որդեգիր ծնողների նկատմամբ, երեխաները նրանց մոտ են գտնվել արդեն 8 ամիս:
UKIP-ի ղեկավարությունը խիստ քննադատել է Ռոտերհեմի քաղաքային խորհրդի գործողությունները՝ դրանք բացատրելով «քաղաքական նախապաշարումներով»:
Ապագայում ամուսնական զույգը դարձյալ կարող է երեխաներ որդեգրել, հայտարարել են քաղաքային խորհրդի անդամները:
