«Նաիրիտ» գործարանի ձեռքբերման խմորումները նորանոր դրսևորումներ են ստանում: Ըստ «Հրապարակ»-ի` տեղեկություններ են շրջանառվում, որ ձեռքբերողների թվում է հայտնվել նաև ԲՀԿ առաջնորդ Գագիկ Ծառուկյանի անունը: Թեև, նույն տեղեկությունների համաձայն, «Նաիրիտի» նկատմամբ Ծառուկյանի հետաքրքրությունը նոր չէ, այն դեռևս Ռոբերտ Քոչարյանի օրոք է ի հայտ եկել` 2006 թվականից: Սակայն չի հաջողվել, քանի որ առանց Քոչարյանի «ակտիվ միջամտության» նման գործարքները չէին կարող իրագործվել:
Ինչ վերաբերում է ներկա մտադրություններին, ապա Ծառուկյանի գործը բարդ է այն պատճառով, որ ուժեղ մրցակից ունի` ռուսական նավթագազային «Իտեռա գրուպը», և իր առաջարկած գինը համեմատաբար ցածր է: Շրջանառվող տեղեկությունների համաձայն, առայժմ սպասողական տրամադրություններ են, ամեն ինչ կախված է «Իտեռայից». եթե այս ընկերությունը ձեռք չբերի, ապա ցածր գնով այն կփորձի ձեռք բերել Գագիկ Ծառուկյանը: Այնպես որ, նախագահական ընտրություններին Ծառուկյանի պահվածքը կախված է մի շարք կարևոր հարցերից:
Ի դեպ, «Նաիրիտի» հետ որոշակի կապ ունի նաև Ռոբերտ Քոչարյանը: Նշենք, որ, ըստ աշնանը տարածված լուրերի, ռուսական նավթագազային «Իտեռա գրուպը» Հայաստանի կառավարության հետ քննարկում է «Նաիրիտ» գործարանի կառավարումը ստանձնելու հնարավորությունը:
