«Ըստ էության ԱԺ ղեկավարը պետք է աջակցեր արտահերթ նիստի կայացմանը, որովհետև Սահմանադրությունը պարտադրում է ԱԺ նախագահին նպաստել ԱԺ բնականոն գործունեությանը, որպեսզի նիստը կայանա: Հակառակ դեպքում, անիմաստ է դառնում փոքրամասնության՝ ԱԺ 1/3-ի՝ նիստի կայացման նախաձեռնությունը»,- «Երկիր Մեդիա» հեռուստաընկերության «Երկրի հարցը» հաղորդման եթերում ասել է ԱԺ ՀԱԿ խմբակցության անդամ Գագիկ Ջհանգիրյանը՝ հավելելով, որ իրենք այս հարցը Սահմանադրական դատարանում վիճարկելու բավարար հիմքեր ունեն: Պատգամավորները, ըստ նրա, նիստերից կարող են բացակայել, բայց՝ ոչ կազմակերպված:
Ըստ բանախոսի՝ ՍԴ ներկայացվող հայցով, այլ հարցերի հետ միասին, ՀԱԿ-ը պահանջելու է արտահերթ նիստին պարտադիր դարձնել ոչ թե 66, այլ 44 պատգամավորների ներկայությունը:
«Բոյկոտը փոքրամասնության զենքն է: Երբեք չեք կարող բերել օրինակ, որ մեծամասնությունը լքել է դահլիճը»,- ասել է պատգամավորը: Նրա խոսքերով՝ բոյկոտելով նիստը՝ իշխանությունը չէր ուզում, որ հրապարակային քննարկվեր 4 քաղաքական ուժերի հրապարակած փաթեթը:
