Ղարաբաղի բնակչությունը չպետք է լինի շրջափակման մեջ և չօգտվի հաղորդակցման հնարավորություններից. այսօր լրագրողների հետ հանդիպման ժամանակ այս մասին ասաց ՀՀ ԱԺ «Հանրապետական» խմբակցության պատգամավոր Արտակ Զաքարյանը՝ խոսելով արտաքին քաղաքական զարգացումների շուրջ:
Մասնավորապես, անդրադառնալով Ադրբեջանի նախագահ Իլհամ Ալիևի թվիթերյան այն գրառմանը, թե Հայաստանն անարժեք երկիր է՝ ասաց, որ ժամանակակից աշխարհի հիմնական տեղեկատվական աղբյուրներն են հանդիսանում սոցիալական ցանցերը: Բանախոսի համոզմամբ՝ Ադրբեջանի հակահայկական քարոզչությունն ակտիվ է տարբեր ցանցերում:
«Տարօրինակ բան փնտրել պետք չէ: Արմենոֆոբիան Ադրբեջանում երկար տարիների պատմություն ունի: Այն Սովետական միության տարիներին ևս նկատելի է եղել: Սա ևս մեկ անգամ հաստատում է, որ ԼՂՀ-ն Ադրբեջանի կազմում լինել չի կարող: Ադրբեջանը ջուր է լցնում հայկական ջրաղացին՝ աշխարհում խորացնելով այն դիրքորոշումը, որ Ադրբեջանը չունի արժեքային այնպիսի համակարգ, որը համահունչ լինի ԵՄ արժեքներին և խաղաղ գոյակցության հաստատված նորմերին»,- ասաց Արտակ Զաքարյանը՝ կարծիք հայտնելով, որ ԱՄՆ տարբեր շրջանակների, ԶԼՄ-ների արձագանքը լինելու է, որ ԼՂՀ բնակչությունը Ադրբեջանում վտանգված է լինելու:
Զուգահեռաբար ՀՀԿ-ական պատգամավորը խոսեց նաև Թուրքիայի խորհրդարանի խոսնակի անդրադարձից, թե Հայաստանն օկուպանտ երկիր է: Նա նշեց, որ թուրքական տեսակետները որոշ առումով կարծես լրացումն են ադրբեջանական քարոզչության: Քաղաքական գործչի համոզմամբ՝ Թուրքիան, գիտակցելով ՀՀ հաջող դերակատարությունը տարածաշրջանում, չի հանդուրժում այդ հանգամանքը:
«Թուրքիային այսօր այլ քայլ չի մնում, քան շարունակել ադրբեջանական քարոզչությունը: Սա չի կարող կառուցողական հարաբերություններ ստեղծել առանց այն էլ լարված տարածաշրջանում, սակայն ՀՀ-ին դուրս բերել հավասարակշռված քաղաքականությունից չի հաջողվելու, որովհետև ՀՀ-ն կարողանում է իր արտաքին քաղաքական վերկտորներում իր քաղաքականությունը պահելով՝ հավասարակշռել տարածաշրջանային ամենատարբեր շահերը»,- մեկնաբանեց բանախոսը:
Անդրադառնալով ԵԱՀԿ Մինսկի խմբի համանախագահների այցին Ստեփանակերտ՝ նա ասաց, որ բանակցային ողջ գործընթացի ընթացքում Ստեփանակերտի և Երևանի բոլոր առաջարկները եղել են հիմնավորումն այն տեսակետի, որ հայկական կողմը խաղաղ կարգավորման գործընթացի կողմնակիցն է: Արտակ Զաքարյանի կարծիքով՝ առաջիկայում էլ ավելի են ուժեղանալու ճնշումներն Ադրբեջանի վրա: Ուժի ցանկացած դրսևորում խիստ հակազդեցության է արժանանալու միջազգային հանրության կողմից:
«Թեև Ադրբեջանը շարունակում է ամենատարբեր հարթակներում նավթադոլարներով հասնել Հայաստանին դատապարտող ամենատարբեր հայտարարությունների, բայց փորձը ցույց է տալիս, որ գնալով ընդլայնվում են իրազեկված շրջանակները և շատ խորհրդարանականներ խուսափում են ադրբեջանական հակաքարոզչության ծուղակն ընկնելուց»,- նշեց պատգամավորը:
Նա այն կարծիքին է, որ Ստեփանակերտում օդանավակայանի բացումն էլ ավելի կմոտեցնի խաղաղության հաստատման հնարավորությունները, քանի որ, նրա դիտարկմամբ, ազատ տեղաշարժման իրավունք ունեն աշխարհի բոլոր երկրները. դա միջազգային սկզբունք է: «Ղարաբաղի բնակչությունը չպետք է լինի շրջափակման մեջ և չօգտվի հաղորդակցման հնարավորություններից: Ես վստահ եմ, որ ադրբեջանական հոխորտանքները չեն իրագործվի, որովհետև վնասել օբյեկտները՝ նշանակում է պատերազմ սկսել: Մերժելով լինել օդանավակայանի ուղևորներ՝ համանախագահները չեն ցանկացել, որ բանակցային գործընթացը մտնի փակուղի»,- եզրափակեց իր խոսքը Արտակ Զաքարյանը:
