Վրաստանի նախագահ Միխեիլ Սաակաշվիլիին մոտ ժամանակներս իմփիչմենթ չի սպառնում: Նման հարց չի բարձրացվի,- վստահեցրել է Վրաստանի վարչապետ Բիձինա Իվանիշվիլին: Այս մասին տեղեկությունը փոխանցում է GHN-ը:
«Մենք մեր հակառակորդների հետ կվարվենք այնպես, ինչպես արժանի է երկիրը, այլ ոչ թե այնպես, ինչին իրենք են արժանի: Մեր կուսակցության և իմ կողմից իմփիչմենթ չի լինի: Իրականացվում են իրավական գործընթացներ, և թող ոչ ոք չզարմանա: Սակայն քաղաքականապես այդ հարցը չի դրվի՝ կապված այն բանի հետ, որ մենք պետք է հարգենք մեր մշակույթն ու մեզ ժողովրդավար ցույց տանք »,- ասել է Իվանիշվիլին:
Միևնույն ժամանակ նա հասկացրել է, որ ցանկանում է արագացնել Սահմանադրական ուղղման ուժի մեջ մտնելը, որը կկրճատի պետության ղեկավարի լիազորությունները:
«Մենք կարող ենք իմփիչմենթ չանել, սակայն կարող ենք այնպես անել, որ նախագահի լիազորությունները շատ արագ համապատասխանեցվեն նոր սահմանդրությանը»,- ասել է Իվանիշվիլին չորեքշաբթի կայացած մամլո ասուլիսի ժաանակ:
Ինչպես հիշեցնում է Reuters-ը, նախկին խորհրդարանը, որտեղ գերիշխել են Սաակաշվիլիի կողմնակիցները, ուղղումներ է ընդունել, որոնք կկրճատեն նախագահի լիազորությունները և կմեծացնեն պատգամավորների ու վարչապետի դերը 2013-ի նախագահական ընտրություններից հետո, որին, երկու ժամկետ պաշտոնվարումից հետո Սաակաշվիլին մասնակցել չի կարող:
Նոր կառավարությունը մտադրություն է հայտնել կրճատել նախագահի աշխատակազմի ծախսերը, խնայել էլեկտրականությունն ու կրճատել նախագահի միջազգային այցերը: Բացի այդ, ձերբակալվեցին մի շարք նախկին բարձրաստիճան պաշտոնյաներ, այդ թվում՝ պաշտպանության և ՆԳ նախկին նախարարը, վրացական բանակի միացյալ շտաբի հրամանատարը և ՆԳ նախկին փոխնախարարը: Նրանց մեղադրել են ապօրիի ազատազրկումների, ապօրինի ճանապարհով քաղաքացիներից անձնական տեղեկություն ստանալու և այլ իրավախախտումների մեջ:
